११ वर्षअघि बानेश्वरस्थित इन्द्रेणी कम्प्लेक्सको पार्किङमा विस्फोटक पदार्थ राखेको अभियोगमा प्रहरीले ललितपुरको गोदावरी नगरपालिका– १० का ३३ वर्षीय महेश केसीलाई पक्राउ गरेको छ ।
जिल्ला प्रहरी परिसर काठमाडौंबाट खटिएको प्रहरी टोलीले उनलाई सोमबार ललितपुरको गोदावरीबाट पक्राउ गरेको हो ।
उनले १३ वैशाख ०६८ मा फिरौती रकम माग्ने उद्देश्यले कम्प्लेक्सको पार्किङमा विस्फोटक पदार्थ राखेको प्रहरीको भनाइ छ । त्यसवेला नेपाली सेनाको टोलीले विस्फोटक पदार्थ डिस्पोज गरेको थियो ।
जिल्ला प्रहरी परिसर काठमाडाैंका प्रवक्ता एसपी दिनेश मैनालीले विस्फोटक पदार्थ कसुरमा संलग्न अभियुक्त ११ वर्षपछि पक्राउ परेको र उनीविरुद्ध थप अनुसन्धानका लागि सात दिनको म्याद लिइएको जानकारी दिए ।
उनले भने, ‘११ वर्षअघि नयाँ बानेश्वरको इन्द्रेणी कम्प्लेक्सको पार्किङमा विस्फोटक पदार्थ राखिएको थियो । घटनामा संलग्न अभियुक्त फरार थिए । खोज्दै जाने क्रममा उनी गोदावरीमा लुकिछिपी बसेको सूचना आयो । प्रहरीले पक्राउ गरेर सात दिन म्याद थप गराई अनुसन्धान अगाडि बढाएको छ ।’
प्रहरीका अनुसार अभियुक्त केसीले विस्फोटक पदार्थ राखेपछि इन्देणी कम्प्लेक्सका सञ्चालकसँग टेलिफोनमार्फत फिरौती रकम मागेका थिए । रकम नदिए कम्प्लेक्स उडाइदिने उनको धम्की थियो । यसका लागि उनले समूह नै बनाएका थिए । विस्फोटक पदार्थ डिस्पोज भएपछि उनीहरू फरार भएका थिए ।
प्रहरीका अनुसार उनीविरुद्ध ‘विष्फोटक पदार्थ ऐन’ कसुर शीर्षकमा मुद्दा दर्ता गरी अनुसन्धानरत भइरहेको छ ।
