बेलायतका राजा चार्ल्स तृतीयका कान्छा छोरा ह्यारीले उनको आगामी पुस्तकमा दाइ विलियमले आफूमाथि भौतिक आक्रमण गरेको खुलासा गरेका छन् । केही वर्षअघि राजपरिवारको सदस्यता अर्थात् शाही पदवी त्यागेका ह्यारीको चाँडै बजारमा आउन लागेको संस्मरणात्मक पुस्तकमा उक्त खुलासा गरिएको छ । यससम्बन्धी समाचार प्रकाशनअघि पुस्तक हात पारेको चर्चित बेलायती मिडिया गार्जियनले पहिलोपटक लेखेको थियो ।
मेघन मार्केलसँगको विवाहबारे कुराकानी हुने क्रममा दाइ विलियमले भौतिक आक्रमण गरेको ह्यारीले संस्मरणमा उल्लेख गरेका छन् । बेलायतका सञ्चारमाध्यममा आफू र आफ्नी श्रीमतीबारे आइरहेका अनर्गल समाचारबारे दाजुभाइबीच बहसको विषय बनेको ह्यारीले पुस्तकमा लेखेको गार्जियनले आफ्नो समाचारमा उल्लेख गरेको छ । ‘स्पेयर’ नामको पुस्तकमा ह्यारीले उनका विगतका धेरै लुकेका पाटा खुलाएको दाबी छ । पुस्तकमा ह्यारीको लागुपदार्थ सेवन, यौन अनुभव, अफगानिस्तानमा सैन्य सेवा र त्यस क्रममा दर्जनौँको हत्या गरेकोजस्ता कुरा समेटिएको चर्चा छ ।
भावी राजा हुने लाइनमा रहेका विलियमले २०१९ मा केन्सिङटन राजप्रासादको मैदानस्थित नटिंघम निवासमा आफ्नी पत्नीलाई ‘अशिष्ट, कठोर र कुपित’ भनेको र विवाद बढ्दै गएपछि आफ्नो ‘कलर’ समातेर भुइँमा लडाएको ह्यारीले पुस्तकमा लेखेको गार्जियनले उजागर गरेको छ । भुइँमा लड्दा आफू कुकुरलाई खाना खुवाउने भाँडोमा गाडिएको, त्यस क्रममा आफूलाई चोट लागेको पनि ह्यारीले संस्मरणमा लेखेका छन् ।
आफू घाइते भएपछि भने विलियमले माफी मागेको पनि पुस्तकमा उल्लेख छ । विश्वका १६ भाषामा प्रकाशन हुनुअघि पुस्तकको स्पेनी भाषाको प्रतिलिपि हात पारेको बताउँदै एसोसिएटेड प्रेस(एपी)ले पनि पुस्तकमा ह्यारीले आफू र शाही परिवारका अन्य सदस्यका जीवनका नखुलेका विवरण उजागर गरेको लेखेको छ । एपीका अनुसार पुस्तकमा उजागर भएका तथ्यले राजपरिवारका विभिन्न सदस्यलाई असर गर्न सक्ने जनाएको छ । ह्यारी सन् २०१२ मा अफगानिस्तानमा तालिबानविरुद्ध बेलायतको सैन्य अभियानमा सरिक भएका थिए ।
त्यसवेला आफूले अपाचे हेलिकोप्टरको सहचालकका साथै एक फौजीका रूपमा २५ जना मारेको प्रसंग पनि संस्मरणमा समावेश छ । उक्त हत्याप्रति आफूलाई न गर्वको न पछुतोकै भावना रहेको ह्यारीले लेखेको मिडियाले दाबी गरेका छन् ।
