ट्रान्सवेल्डका २५ केभिएदेखि दुई हजार केभिए क्षमतासम्मको ट्रान्सफर्मर, गुणस्तरमा प्राथमिकता
काठमाडौंको भृकुटीमण्डपमा जारी ‘फिन इलेक्ट्रोे टेक’ मेलामा ट्रान्सवेल्ड ट्रान्सफर्मर कम्पनीले पनि आफ्नो उत्पादन प्रदर्शनीमा रोखेको छ । गत २२ मंसिरबाट जारी मेलामा कम्पनीले विभिन्न क्षमताका ट्रान्सफर्मर प्रदर्शनीमा राखेको हो ।
विशेष गरी आफ्ना ग्राहकसँग प्रत्यक्ष कुराकानी गर्न, प्रडक्टबारे जानकारी दिनेलगायत उद्देश्यसहित ट्रान्सफर्मर प्रदर्शनीमा राखेको कम्पनीका प्रबन्ध निर्देशक अमुल श्रेष्ठले बताए ।
‘यसअघि विभिन्न माध्यमबाट ग्राहकले हाम्रो उत्पादन प्रयोग गरिरहेका थिए । तर, उनीहरूसँग हाम्रो प्रत्यक्ष कुराकानी गर्ने मौका मिलेको थिएन,’ उनले भने, ‘अहिले ग्राहकसँग प्रत्यक्ष कुराकानी गर्ने, उनीहरूको सल्लाह–सुझाव लिने वातावरण बनेको छ । सोही उद्देश्यसहित नै हामीले मेलामा स्टल राखेका हौँ । यहाँबाट हाम्रो उत्पादनको बिक्री–वितरण हुँदैन । विशुद्ध रूपमा हाम्रो उत्पादनबारे जानकारी दिने तथा ग्राहकका सुझाव सुन्ने काम गरेका छौँ ।’ मेला आइतबारसम्म चल्नेछ ।
ट्रान्सवेल्ड स्वदेशी ट्रान्सफर्मर उद्योग हो । यसले भारतलगायतका देशबाट कच्चा पदार्थ आयात गरेर नेपालमै ट्रान्सफर्मर उत्पादन गर्दै आएको छ । १९९५ मा स्थापना भएको यस कम्पनीले हालसम्म १० हजारभन्दा बढी ट्रान्सफर्मर बनाइसकेको छ ।
यस कम्पनीले २५ केभिएदेखि दुई हजार केभिए क्षमतासम्मको ट्रान्सफर्मर बनाउँछ । मूल्यका आधारमा दुई लाख ५० हजार रुपैयाँदेखि ५० लाख रुपैयाँसम्मका ट्रान्सफर्मर यस कम्पनीमा रहेका छन् । नेपाली बजारमा सबैभन्दा बढी हिस्सा ओगट्नेमध्ये यो पनि एक ट्रान्सफर्मर कम्पनी हो । विद्युत् सेवा विस्तार हुने औद्योगिक क्षेत्र, जलविद्युत् आयोजना, लघु जलविद्युत् आयोजना, होटेल, हस्पिटल, विद्यालयलगायतका ठाउँमा यसको प्रयोग हुन्छ ।
कम्पनीका प्रबन्ध निर्देशक श्रेष्ठले आफूहरूले बनाउने गरेको ट्रान्सफर्मर गुणस्तरीय हुने बताए । ‘नेपालमा विदेशी मुलुकबाट पनि ट्रान्सफर्मर ल्याएर बिक्री–वितरण भइरहेका छन्, उनीहरू हाम्रो भन्दा सस्तो पनि छन्,’ उनले भने, ‘तर, गुणस्तरमा हामी नै अघि छौँ । तसर्थ, गुणस्तरीय ट्रान्सफर्मर प्रयोग गर्ने मामलामा मूल्यलाई आधार नबनाउन म आमग्राहकमा अनुरोध गर्दछु ।’ साथै, ग्राहकले नेपाली उत्पादन प्रयोग गरेर नेपाली उद्योगलाई प्रोत्साहन गर्नुपर्ने उनको भनाइ छ ।
