काठमाडौं उपत्यकाको भित्री चक्रपथको ग्वार्काे चोकमा फ्लाई ओभर (ओभर पास) बनाउन सुरु गरिएको छ । आयोजनाको ठेक्का प्राप्त आरसी, समानान्तर र रेलिग्रेले शुक्रबार साँझदेखि निर्माणको काम सुरु गरेका हुन् ।
पहिलो चरणमा निर्माण पूर्वतयारीको काम सुरु गरिएको हो । पूर्वतयारीको काम सम्पन्न गरेर एक महिनामा कोर फ्लाई ओभरको संरचना बनाउन सुरु गर्ने लक्ष्य लिइएको छ । सोहीअनुसार शुक्रबार ट्राफिक व्यवस्थापन तथा डाइभर्सन बनाउने काम सुरु भएको छ । आठ लेनको उक्त सडकखण्डमा बीचको चार लेन सडकमा फ्लाई ओभर बनाइनेछ । त्यसकारण निर्माण अवधिमा ग्वार्काे खण्डमा बीचको चार लेन पूर्ण रूपमा बन्द गर्नुपर्छ । त्यसका लागि त्यस क्षेत्रका सवारीसाधनले सर्भिस लेन प्रयोग गर्नुपर्नेछ ।
सोहीअनुसार शुक्रबार ग्वार्काे खण्डमा मेन लेन र सर्भिस लेनबीचको १५–१५ मिटर (दुवैतर्फ) फुटपाथ भत्काइएको छ । योसँगै अब मेन लेनबाट सर्भिस लेनमा सवारी प्रवेश गर्न सक्ने छन् । साथै, ट्राफिक ड्राइभर्सनको सूचनासमेत टाँसिएको छ । योसँगै अब बीचको चार लेन सडक पूर्ण रूपमा बन्द हुनेछ ।
यस्तै, अब निर्माण क्षेत्रमा क्याम्प बनाउने, बार लगाउनेलगायतका पूर्वतयारीका काम गरिनेछ । त्यसपछि कोर फ्लाई ओभरको संरचना बनाउने काम सुरु हुनेछ । भौतिक निर्माणको काम सुरु गर्न झन्डै एक महिना समय लाग्ने सडक विभागका निर्देशक रवीन्द्रनाथ श्रेष्ठले बताए । निर्माण कार्य बालकुमारी साइटबाट सुरु भएको उनको भनाइ छ । ट्राफिक व्यवस्थापनलाई लक्षित गरेर तयारीको काम रातको समयमा गरिने उनले बताए ।
सडक विभागले ट्राफिक व्यवस्थापन सहज बनाउने उद्देश्यसहित चक्रपथको ग्वार्काे, एकान्तकुना र सातदोबाटो चोकमा फ्लाई ओभर बनाउने योजना अघि बढाएको थियो । त्यसैको पहिलो चरणका रूपमा ग्वार्काे चोकको फ्लाई ओभर निर्माण गर्न लागिएको हो । नेपालको सडक सञ्जालमा बन्न लागेको यो पहिलो फ्लाई ओभर पुल हो । यद्यपि, नागढुंगा सुरुङमार्गमा पनि एक फ्लाई ओभर निर्माण हुनेछ । तर, त्यसको अझै निर्माण सुरु भएको छैन ।
सडक विभागले निर्माण कम्पनीसँग दुई वर्षको अवधिसहित ठेक्का सम्झौता गरेको छ । त्यसमा डिजाइन बनाउँदा ९–१० महिना बितिसकेको छ । अब बाँकी रहेको १४ महिनामै निर्माण सम्पन गर्ने लक्ष्य लिइएको छ ।
यस्तो हुनेछ फ्लाई ओभर
फ्लाई ओभरको कुल लम्बाइ चार सय ९० मिटर हुनेछ । त्यसमा बालकुमारी तर्फबाट दुई सय ८० मिटर लामो र्याम र सातदोबाटोतर्फबाट एक सय ७५ मिटर लम्बाइको र्याम बनाइनेछ । बीचको सुपर स्ट्रक्चरको लम्बाइ भने ३५ मिटर लामो हुनेछ । फ्लाई ओभरको उचाइ भने अन्तर्राष्ट्रिय मापदण्डअनुसार ६ मिटर हुने बताइएको छ ।
हाल चक्रपथमा आठ लेनको सडक रहेको छ । त्यसमा बीचको चार लेनको सडकलाई फ्लाई ओभरमार्फत माथि उठाइनेछ, जसमा चक्रपथमै आवतजावत गर्ने सवारीसाधन चल्नेछन् । मंगलबजार–इमाडोल–मंगलबजार आवतजावत गर्ने सवारीसाधन भने फ्लाई ओभरमुनिबाट जानुपर्नेछ ।
१७ करोड ६ लाख लगानी
यो फ्लाई ओभर नेपाल सरकारकै लगानीमा बन्नेछ । त्यसमा १७ करोड ६ लाख रुपैयाँ लगानी लाग्नेछ । सोही रकममै निर्माण कम्पनीसँग ठेक्का सम्झौता भएको विभागको भनाइ छ ।
विभागले इपिसी (इन्जिनियरिङ प्रोक्युअमन्ट एन्ड कन्स्ट्रक्सन) मोडलमा उक्त आयोजना बनाउने गरी साउन ०७८ मा टेन्डर आह्वान गरेको थियो । त्यसपछि माघ ०७८ मा आरसी, समानान्तर र रेलिग्रे जेभी त्यसमा छनोट भएका थिए । त्यसलगत्तै ठेक्का सम्झौता गरेर निर्माण कम्पनीहरूले फागुन ०७८ देखि आयोजनाको डिजाइन बनाउन सुरु गरेका थिए ।
शुक्रबार दिनभर ट्राफिक जाम
निर्माण कार्य सुरु गर्ने भएपछि ट्राफिक प्रहरीले शुक्रबार बिहानैदेखि बीचको चार लेनमा सवारीसाधन प्रवेश गर्न निषेध गरेको थियो । फलस्वरूप शुक्रबार दिनभर नै ग्वार्काेमा ट्राफिक जाम भएको थियो । साथै, निर्माण अवधिभर ग्वार्काे र आसपासका क्षेत्रमा ट्राफिक व्यवस्थापन चुनौतीपूर्ण हुने बताइएको छ ।
यसरी गरिँदै छ ट्राफिक व्यवस्थापन
फ्लाई ओभरको निर्माण अवधिभर कोटेश्वरबाट सातदोबाटोतर्फ जाने यात्रुवाहक, मालवाहक तथा दुईपांग्रे सवारीसाधनलाई बालकुमारी पुलबाट सर्भिस लेनमा र साना चारपांग्रे सवारीसाधनलाई फास्ट ट्र्याकबाट चलाइनेछ । कोटेश्वरबाट सातदोबाटोतर्फ जाने र आउने सम्पूर्ण सवारीसाधनलाई भने ग्वार्काे चोकभन्दा ६ सय मिटरअगाडि र पछाडि सर्भिस लेनबाट सञ्चालन गरिनेछ । बल्खुबाट सातदोबाटो हुँदै कोटेश्वरतर्फ आउने सवारीसाधनलाई सर्भिस लेनमा र साना चारपांग्रे गाडीलाई फास्ट ट्र्याकबाट सञ्चालन गरिनेछ ।
