हिन्दी भाषालाई देशव्यापी रूपमा प्रयोग गर्ने नयाँदिल्लीको प्रयासको विरोधमा दक्षिण भारतमा एक ८५ वर्षीयले आत्मदाह गरेको प्रहरीले आइतबार जनाएको छ । दक्षिणी राज्य तमिलनाडुका कृषक एमभी थंगावेलले पेट्रोल र मट्टीतेल खन्याएर आत्मदाह गरेका हुन् ।
आत्मदाह गर्दा उनले तमिल भाषाको “मोदी सरकार हिन्दी थोपर्न बन्द गर । हामीले साहित्यले भरिपूर्ण तमिलभन्दा हिन्दीलाई किन रोज्नुपर्यो ? यसले हाम्रा युवाहरूको भविष्यलाई असर गर्नेछ,” लेखिएको प्लेकार्ड बोकेका थिए ।
सयौँ भाषा बोलिने भारतमा भाषा निकै भावनात्मक मुद्दा हो । सन् २०११ को पछिल्लो जनगणनाअनुसार आधाभन्दा कम भारतीयले मात्रै हिन्दी बोल्न सक्छन् । तर, गत महिना भारतीय जनता पार्टीका नेता तथा गृहमन्त्री अमित शाहको नेतृत्वमा सांसदहरूको एक समूहले चिकित्सा र इन्जिनियरिङजस्ता प्राविधिक शिक्षालगायतमा हिन्दीलाई राष्ट्रिय आधिकारिक भाषा बनाउन सुझाव दिएको थियो । हिन्दू राष्ट्रवादी प्रधानमन्त्री नरेन्द्र मोदीले अंग्रेजीको सट्टा भारतीय भाषाको प्रयोगमा जोड दिँदै आएका छन् ।
यसले दक्षिण भारतमा विशेष आक्रोश उत्पन्न गरेको छ । थंगावेलले शनिबार तमिलनाडुको सत्तारूढ डिएमके पार्टीको सलेमस्थित कार्यालयबाहिर केन्द्र सरकारको उक्त प्रस्तावविरुद्ध प्रदर्शन गरेका थिए । यसअघि सन् १९६० को दशकमा पनि तत्कालीन सत्तारूढ कांग्र्रेस पार्टीले हिन्दीभाषालाई आधिकारिक राष्ट्रिय भाषा बनाउन खोजेपछि दक्षिण भारतमा आक्रोश उत्पन्न भएको थियो ।
