- वि.सं २o७९ कार्तिक २५ शुक्रबार
विश्वकै ठूलो पर्यटन मेला मानिने वर्ल्ड ट्राभल मार्ट (डब्लुटिएम), २०२२ बेलायतमा सम्पन्न भएको छ । कोभिडपछि आयोजना गरिएको डब्लुटिएममा पर्यटन बोर्डको नेतृत्वमा नेपालका २४ पर्यटन कम्पनीको सहभागिता थियो । यस मार्टले नेपालको पर्यटन पुनरुत्थानमा सहयोग पुगेको बोर्डको विश्वास छ ।
डब्लुटिएममा रहेको नेपालको स्टलको बेलायतका लागि नेपाली राजदूत ज्ञानचन्द्र आचार्यले उद्घाटन गरेका थिए । मेलामा सहभागी कम्पनीहरूलाई देशको पर्यटन प्रवर्द्धनमा प्रयास गर्न प्रोत्साहित गरे ।
बोर्डका प्रमुख कार्यकारी अधिकृत डा. धनञ्जय रेग्मीले मेलाले कोभिडले थलिएको पर्यटन प्रवर्द्धनमा सकारात्मक भूमिका खेल्ने बताए । ‘मेलामा सहभागी नेपाली व्यवसायीहरूले विश्वका ट्राभल कम्पनीहरूसँग पुराना व्यावसायिक सम्पर्कहरू नवीकरण गर्ने र नयाँ व्यापार साझेदारी स्थापना गर्ने अवसर पाएका छन्, जसले पर्यटनलाई पुनः लयमा फर्काउन सहयोग पुग्नेछ,’ उनले भने ।
नेपालको स्टलमा बेलायत र अन्य विभिन्न देशका पर्यटन व्यवसायी, मार्केटिङ परामर्शदाता, मिडिया, टुर अपरेटरहरू, निजी कम्पनी, ट्राभल लेखकहरू, मिडिया, फोटोग्राफर, ब्लगर र सामग्री निर्माताहरूको सहभागिता थियो ।
