- वि.सं २o८१ बैशाख २४ सोमबार
सीमान्तकृत थामी समुदायको लोक संस्कृति उजागर गर्ने उद्देश्यले दरबारमार्गमा ‘यापति सोनारी सांगीतिक साँझ’ आयोजना भएको छ । कार्यक्रम दरबारमार्गस्थित ‘क्विन स्पाइस लाउन्ज’मा भएको हो ।
कार्यक्रममा मुलुकभरका थामी कलाकारले गीत, नृत्य, नाटक, क्यारिकेचरलगायतका प्रस्तुति दिएका थिए । कलाकार सेरा थामी, शिखर थामी, रमण थामीलगायत २० जनाभन्दा बढी कलाकारले कार्यक्रमलाई निकै आकर्षक बनाएका थिए । कार्यक्रमले थामी कला संस्कृतिलाई मूलधारमा ल्याउन महत्वपूर्ण भूमिका निर्वाह गर्ने कलाकार सेरा थामीले बताए । उनले भने, ‘थामी समुदाय कला र संस्कृतिको खानी हो । तर, मूलधारमा नआउँदा यी कलासंस्कृति लोप हुने अवस्थामा छन् । नयाँ पुस्तामा हस्तान्तरण गर्न जरुरी छ । यही उद्देश्यले कार्यक्रम आयोजना गरेका हौँ ।’
कार्यक्रमका संयोजक शिखर थामीका अनुसार कलाकारहरूले थामी र नेपाली दुवै भाषामा रोचक प्रस्तुति दिएका थिए । मारुनी, ख्याली, सैहोले वोन्वोलगायतका मौलिक प्रस्तुतिले कार्यक्रम विशेष रोचक बनेको थियो । कार्यक्रममा दुई सयभन्दा बढी दर्शकको सहभागिता रहेको संयोजक शिखरले जानकारी दिए ।
