- वि.सं २o७९ असार १२ आइतबार
पौवादुङ गाउँपालिकाले तोकिएको समयमा गुणस्तरीय काम गर्ने निर्माण व्यवसायीलाई सम्मान गरेको छ । तोकिएको मापदण्डअनुसार निर्धारित समयमै काम सम्पन्न गरेको जनाउँदै राउत कन्स्ट्रक्सनका सञ्चालक कुलबहादुर राउतलाई गाउँपालिकाले सम्मान गरेको हो ।
पौवादुङको मुख्य सडकका रूपमा रहेको तिवारीभञ्याङ–च्याङ्ग्रे–मानेडाँडा–अधेँरीघाट ३५ किलोमिटर सडकमध्ये १३ किलोमिटर स्तरोन्नतिको काम तोकिएको समयमा सम्पन्न गरेकाले कामको सम्मान गर्न निर्माण व्यवसायी राउतलाई सम्मान गरिएको गाउँपालिका अध्यक्ष किरण राईले जानकारी दिए । ‘हामीले राम्रो काम गर्ने निर्माण व्यवसायीलाई सम्मान गरेका छौँ, यसले राम्रो काम गर्ने व्यवसायीलाई काम गर्ने थप ऊर्जा मिल्नेछ,’ उनले भने ।
अहिले स्तरोन्नतिको काम भइरहेको भए पनि यो सडकलाई आफ्नो कार्यकालभित्र कालोपत्र गर्ने उद्देश्य रहेको अध्यक्ष राईले जानकारी दिए । सडकलाई गुणस्तरीय तवरबाट समयमा सम्पन्न गराउन गाउँपालिकाका प्राविधिक तथा इन्जिनियरले नियमित अनुगमन तथा आवश्यक सहयोग पुर्याएको प्रमुख प्रशासकीय अधिकृत नवीन भट्टराईले बताए । ‘राम्रो काम गर्ने व्यक्तिलाई प्रोत्साहन गर्ने उद्देश्यले गाउँपालिकाले उहाँलाई सम्मान गरेको हो,’ उनले भने ।
गाउँपालिकाले गरेको यो सम्मानले आफूलाई काम गर्न थप ऊर्जा मिलेको राउत कन्स्ट्रक्सनका सञ्चालक राउतले बताए । उनले भने, ‘उहाँहरूको साथ–सहयोगविना यो काम सम्भव थिएन । स्थानीय, गाउँपालिकाका कर्मचारी तथा गाउँपालिका अध्यक्षको सहयोगमा म समयमै काम सम्पन्न गर्न सफल भएँ । मेरो कामको सम्मान गरिदिनुभएकाेमा गाउँपालिका अध्यक्ष तथा गाउँपालिकाप्रति हार्दिक आभार व्यक्त गर्दछु ।’
सडकको स्तरोन्नतिले यहाँका सानोदुम्मा, ठूलोदुम्मा र बास्तिमका नागरिक बाह्रै महिना सडकको पहुँचमा जोडिएका छन् । यो सडक जिल्लाको पूर्वी क्षेत्रबाट तराई जिल्ला जोड्नका लागि सबैभन्दा छोटो मार्ग हो । यो सडकबाट यात्रा गर्दा २३ किलाेमिटर बाटो छोटो हुनेछ ।
