- वि.सं २o८१ बैशाख १९ बुधबार
प्रधानमन्त्री शेरबहादुर देउवाले सप्तरीका मिटरब्याजी रामदेव तेलीलाई तत्काल पक्राउ गरेर अनुसन्धान अघि बढाउन निर्देशन दिएका छन्। प्रधानमन्त्री देउवाले गृहमन्त्री बालकृष्ण खाणलाई टेलिफोनमार्फत यस्तो निर्देशन दिएका हुन्।
खडक नगरपालिकाको कल्याणपुरका ६७ वर्षीय तेलीले मिटरब्याजमा सर्वसाधारणबाट करोडौँ असुल गरेकाे समाचार नयाँ पत्रिकामा प्रकाशित भएको थियो। साे समाचार प्रकाशित भएपछि प्रधानमन्त्री देउवाले मिटरब्याजी तेलीलाई पक्राउ गर्न गृहमन्त्रीलाई निर्देशन दिएका प्रधानमन्त्रीका प्रेस प्रमुख गोविन्द परियारले जानकारी दिए।
तेलीले डेढ दशकयता मिटरब्याजमा सर्वसाधारणबाट करोडौँ असुल मात्रै गरेका छैनन्, साँवाको ६ गुना रकम उठाइसक्दा पनि ‘बन्धकी’ राखेको जग्गा फिर्ता गरेका छैनन् ।
नयाँ पत्रिकाले पछिल्लो समय सर्लाहीको चन्द्रनगर गाउँपालिका– ३ बडकुर्वाका साहुकार नरेश चौधरी, सर्लाहीका श्यामकृष्ण साह कलवार (श्याम परदेशी) र रामबाबु राय यादव, विराटनगर महानगरपालिका– ९ घोगापुल चोकमा बस्दै आएका ४२ वर्षीय मन्टु भनिने सञ्जयप्रसाद रौनियार, सप्तरी खडक नगरपालिकाको कल्याणपुर घर भएका ६७ वर्षीय रामदेव साहु तेलीलगायतबाट पीडितहरूको समाचार प्रकाशन गरेको थियो ।
