- वि.सं २o८१ जेठ १ मंगलबार
सुदूरपश्चिम प्रदेशको अस्थायी राजधानी धनगढी उपमहानगरपालिकाको मेयरमा स्वतन्त्र उम्मेदवार गोपाल हमालको जित सुनिश्चित भएको छ । सात हजार ४८९ मत गणना बाँकी रहँदै निकटतम् प्रतिस्पर्धीभन्दा ११ हजार ७५८ मतले अगाडि रहेका उनले २४ हजार ५२९ मत पाएका छन् । गठबन्धनका तर्फबाट मेयरका उम्मेदवार नृपबहादुर बडले १२ हजार ७७१ मत पाएका छन् । बड निवर्तमान मेयर हुन् ।
२०७४ को स्थानीय तह निर्वाचनमा पनि मेयरमा स्वतन्त्र उम्मेदवारी दिएका हमाललाई बडले पराजित गरेका थिए । सुन्दर सुदूरपश्चिम अभियानका अभियन्ता हमाल यस क्षेत्रका प्रतिष्ठित व्यवसायी हुन् । धनगढीमा कुल खसेको ६३ हजार ७१५ मतमध्ये ५६ हजार २२६ मत गणना सकिएको छ । मेयरमा नेकपा एमालेका उम्मेदवार रणबहादुर चन्द सात हजार ३८६ मतसहित तेस्रो स्थानमा छन् ।
उपमेयरमा भने गठबन्धनबाट माओवादीका उम्मेदवार शान्ति अधिकारीलाई एमालेकी कन्दकला रानाले उछिनेकी छिन् । सुरुवाती अग्रता लिइरहेकी अधिकारी एक हजार पाँच मतले पछि परेकी छिन् । रानाले १२ हजार ५९४ र अधिकारीले ११ हजार ५८९ मत पाएका छन् । उपमेयरमा स्वतन्त्र उम्मेदवारी दिएका प्रभाकर भण्डारीले छ हजार ३११ मत पाएका छन् । उनी नेपाली कांग्रेस कैलालीका पूर्वकोषाध्यक्ष हुन् ।
