अमेरिकी बाबु र भारतीय आमाबीच सम्बन्ध बिग्रिँदा तनाव नेपालसम्म

अध्यागमन विभाग परिसरमै आठ वर्षीया बालिकाको तानातान

श्रीमान्–श्रीमतीबीचको सम्बन्ध बिग्रेपछि आश्रित सन्तानले कुन हदसम्मको मानसिक तनाव झेल्नुपर्छ भन्ने पछिल्लो उदाहरण हुन्, अमेरिकी नागरिक आठ वर्षीया मेहेर गोयल । बुबा–आमाबीच सम्बन्ध बिग्रिएपछि उनले जति तनाव अमेरिकामा झेलिन्, भारतमा पनि त्यस्तै बेहोरिन् । कतिसम्म भने कुनै साइनो सम्बन्ध नै नभएको नेपालमा समेत उनले अनावश्यक तनाव झेल्नुपर्ने परिस्थिति बन्यो । 

कन्निका गोयल : भारतीय नागरिक
मेरी छोरीलाई करणले अपरहण गरेर नेपाल ल्यायो । छोरी मसँगै रहने आदेश भारतीय सर्वोच्च अदालतले गरेको छ । उनको यो गतिविधि भारतीय अदालतको खिलाप छ । मसँग यसका सबै प्रमाण छन् । करणले दूतावास प्रयोग गरेर मेरी छोरी मसँग खोस्यो । म छोरी पछ्याउँदै नेपाल आएकी छु । मलाई अहिले सहयोगको खाँचो छ ।

आमाबाट छुटाएर नेपाल ल्याइएकी मेहेरलाई लिएर करण गोयल बुधबार कालिकास्थानस्थित अध्यागमन विभाग मात्र के पुगेका थिए, पछ्याउँदै आएकी कन्निका पनि त्यहीँ भेटिइन् । एकाएक आमा देखेपछि मेहेर चिच्याउन थालिन् । छोरीतर्फ अघि बढेकी कन्निकालाई करणका सहयोगीले बीचमै रोके । दिनदहाडै विभाग परिसरमै करण र कन्निका पक्षबीच तानातान चल्यो । स्थिति नियन्त्रणभन्दा बाहिर पुग्ने देखिएपछि अध्यागमनका सुरक्षाकर्मी अघि बढे । तर पनि दुई पक्षबीच तानातान चलिरह्यो । 

तनावपूर्ण वातावरणबीच करणको छातीमा टाँस्सिएकी मेहेर एकोहोरो कराउँदै थिइन्, ‘आई वान्ट टु गो विथ मम । आई वान्ट टु गो विथ मम ।’ तर, मेहेरको चित्कारतर्फ न बुबा करणको ध्यान थियो, न आमा कन्निकाको नजर नै त्यसतर्फ थियो । तनाव बढ्दै गएपछि विभागका महानिर्देशक नारायणप्रसाद भट्टराईले दुवै पक्षलाई कार्यकक्षमा बोलाए । र, विवाद समाधानको सहजीकरणमा जुटे । तर, विवाद मिल्ने छाँट देखिएन । आठ वर्षीया मेहेर भने एकोहोरो भनिरहेकी थिइन्, ‘आई वान्ट टु गो विथ मम । आई वान्ट टु गो विथ मम ।’

समस्या सुल्झिनेभन्दा पनि बल्झिनेतर्फ अघि बढेपछि विभागले नेपालस्थित अमेरिकी दूतावास र भारतीय दूतावासको प्रतिनिधिलाई बोलायो । दुई पक्षलाई छुट्टाछुट्टै राखेर वार्ता चल्यो । करिब दुई घन्टा दुई पक्षबीच वार्तामा बसे । मिल्ने छाँट नभएपछि विभागका महानिर्देशक भट्टराईले दुवै दूतावासको प्रतिनिधिको रोहवरमा मेहेरलाई बुबा करणकै साथ जिम्मा लगाएर पठाए । ‘श्रीमान्–श्रीमतीबीचको विवाद रहेछ । विवादकै कारण श्रीमती श्रीमान् छाडेर भारत आइछन् । बच्चा पनि आमासँगै रहिछन् । बच्चालाई बुबा करणले आफैँले राख्न चाहेका रहेछन् । तर, आमा कुनै हालतमा नदिने पक्षमा । यो विवाद अमेरिकी अदालत हुँदै भारत आइपुग्यो । अहिले हामीकहाँ आइपुग्यो । घटना सिरियसजस्तो देखिन्छ,’ महानिर्देशक भट्टराईले भने ।

नारायणप्रसाद भट्टराई : महानिर्देशक, अध्यागमन विभाग
श्रीमान्–श्रीमतीबीचको विवाद रहेछ । विवादकै करण श्रीमती श्रीमान् छाडेर भारत आइछन् । बच्चा पनि आमासँगै रहिछन् । बच्चालाई बुबा करणले आफैँले राख्न चाहेका रहेछन् । तर, आमा कुनै हालतमा नदिने पक्षमा । यो विवाद अमेरिकी अदालत हुँदै भारत आइपुग्यो । अहिले हामीकहाँ आइपुग्यो । घटना सिरियसजस्तो देखिन्छ ।

यसरी सुरु भयो विवाद 
अमेरिकी नागरिक करणको कन्निकासँग अमेरिकामै भेट भयो । दुईबीच केही वर्ष मायाप्रेम चल्यो । यहीबीच विवाह भयो । छोरी मेहेर जन्मिइन् । पछि विवाद बढ्दै गयो । सँगै बस्न नसक्ने अवस्था सिर्जना भएपछि दुवै सम्बन्धविच्छेद गर्ने मुडमा पुगे । मुद्दा अमेरिकी अदालत पुग्यो । यसबीचमा मेहेर कोसँग रहने विषय पेचिलो बन्दै गयो । अमेरिकी अदालतले मेहेर बुबा करणसँगै रहने आदेश दियो । आमा कन्निका यही झोकमा मेहेरलाई लिएर भारत आइन् र नयाँदिल्लीस्थित पुख्र्यौली घरमा बस्न थालिन् । यही क्रममा उनले सम्बन्धविच्छेदको मुद्दा भारतीय अदालतमा पनि दिइन् । मुद्दा अदालतमा चल्दै गयो । बुबा करण छोरी लिन भारत आए । तर, कन्निकाले छोरी करणलाई दिन मानिनन् । 

यही क्रममा भारतीय सर्वोच्च अदालतले मेहेर आमासँगै रहने अर्को आदेश दियो । अब छोरी मेहेरलाई सँगै लिएर अमेरिका जाने करणको सपना पूरा हुने देखिएन । उनले फेरि भारतीय अदालतमा अर्को मुद्दा हाले । अन्ततः भारतीय उच्च अदालतले बुबा करणलाई पनि मेहेरलाई भेट्न दिन आदेश दियो । सोहीअनुसार कन्निकाले मेहेरलाई बुबा करणकहाँ लगिन् । मेहेरलाई अमेरिका लैजान सक्ने भएपछि अदालतको आदेशअनुसार कन्निकाले करणको पासपोर्ट अदालतमा राख्न लगाइन् । अनि दिल्लीस्थित होटेल हायातमा बसेका करणलाई मेहेर जिम्मा लगाइन् । र, आफू घर फर्किइन् । तर, करणले मेहेरलाई भोलिपल्टै होटेलबाट सुटुक्कै नेपाल ल्याए । भारत–नेपालको पश्चिम सिमानाका बनबासाबाट उनले मेहेरलाई नेपाल ल्याएका थिए । यही क्रममा मेहेरलाई अमेरिका लैजान कागजात मिलाउन बुधबार विभाग लगिएको थियो । 

विभाग परिसरमा भेटिएकी कन्निकाले छोरी मेहेरलाई करणले अपहरण गरेर नेपाल ल्याएको आरोप लगाएकी छन् । उनका अनुसार करणले भारतीय सर्वोच्च अदालतको समेत आदेश उल्लंघन गरेका छन् । भारतबाट अमेरिका लैजान सम्भव नभएपछि उनले नेपालको बाटो प्रयोग गरेको कन्निकाको भनाइ छ । 

‘मेरी छोरीलाई करणले अपहरण गरेर नेपाल ल्यायो । छोरी मसँगै रहने आदेश भारतीय सर्वोच्च अदालतले गरेको छ । उनको यो गतिविधि भारतीय अदालतको खिलाप छ । मसँग यसका सबै प्रमाण छन् । करणले दूतावास प्रयोग गरेर मेरी छोरी मसँग खोस्यो । म छोरी पछ्याउँदै नेपाल आएकी छु । मलाई अहिले सहयोगको खाँचो छ,’ कन्निकाले नयाँ पत्रिकासँग भनिन् । कन्निकाका अनुसार मेहेर अपहरणमा परेका विषयमा भारतीय प्रहरीमा समेत जाहेरी परेको छ । भारतीय प्रहरीले घटनाको अनुसन्धान गरिरहेको उनको भनाइ छ । संवेदनशील भएको हुँदा यसमा नेपाल सरकारको सहयोग आवश्यक रहेको उनले बताइन् ।