नेपाली ब्याडमिन्टनका युवा खेलाडी प्रिन्स दाहाल विश्व ब्याडमिन्टन जुनियर वरीयताको शीर्षस्थानमा उक्लिएका छन् । विश्व ब्याडमिन्टन महासंघ (बिडब्लुएफ)ले मंगलबार सार्वजनिक गरेको नयाँ वरीयतामा प्रिन्स शीर्षस्थानमा उक्लिएका हुन् ।

गत वर्ष सार्वजनिक वरीयतामा प्रिन्स तेस्रो स्थानमा थिए । सन् २०२१ मा कोरोना महामारीका कारण अन्तर्राष्ट्रिय प्रतियोगिता हुन नसक्दा वरीयता एक वर्षपछि परिवर्तन भएको हो ।

विश्व जुनियर वरीयतामा यसअघि प्रिन्स सातौँ र ११औँ स्थानमा रहेका थिए । प्रिन्सको वरीयतामा १० हजार चार सय अंक छ । कोरोना महामारीका कारण पछिल्लो समय अन्तर्राष्ट्रिय प्रतियोगिता हुन नसक्दा उनको अंकमा पनि परिवर्तन भएको छैन ।

मलेसियाका जस्टिन हो ९५९० अंकसहित दोस्रो स्थानमा तथा मलेसियाकै मोहम्मद रजिफ ६९२५ अंकसहित तेस्रो स्थानमा छन् । प्रिन्स जुनियर वरीयतामा डबल्सतर्फ नवौँ स्थानमा रहेको छ । जुनियरमै रसिला महर्जन एकलमा १९औँ स्थानमा तथा डबल्समा सातौँ स्थानमा रहेकी छिन् ।