- वि.सं २o७८ कार्तिक २६ शुक्रबार
सीधा हवाई सम्पर्क नभए पनि युरोपको बेलायत, फ्रान्स, जर्मनीदेखि अस्ट्रेलियासम्म नेपाल एयरलाइन्सकै टिकटमा यात्रा गर्न पाइने भएको छ । नेपाल एयरलाइन्सले आफ्नो सीधा उडान नभएका मुलुकमा पनि यात्रुलाई सेवा दिन चारवटा अन्तर्राष्ट्रिय एयरलाइन्स कम्पनीसँग द्विपक्षीय सम्झौता गरेको छ ।
नेपाल एयरलाइन्सले थाइल्यान्डको थाई एयरवेज, जापानको निप्पोन एयरलाइन्स, युएईको इमिरेट्स एयर र कुवेतको कुवेत एयरवेजसँग द्विपक्षीय स्पेसियल प्रोरेट एग्रिमेन्ट (एसपिए) सम्झौता गरेको हो । यो सम्झौतापछि नेपाल एयरलाइन्सलाई स्विट्जरल्यान्डको जुरिच, बेलायतको लन्डन, जर्मनीको फ्र्यांकफर्ट, फ्रान्सको पेरिस, अस्ट्रेलियाको सिड्नी, दक्षिण कोरियाको सिओल, जापानको टोकियो, कुवेत, बहराइनजस्ता सीधा उडान नहुने गन्तव्यहरूमा पनि सेवा विस्तार गर्न बाटो खुलेको छ ।
यात्रुको सहजतालाई ध्यानमा राखेर सकेसम्म कम ट्रान्जिट टाइम प्रयोग गरी सहजै गन्तव्यमा पुर्याउने गरेर अन्तर्राष्ट्रिय एयरलाइन्ससँग सम्झौता भएको नेपाल एयरलाइन्सले जनाएको छ । नेपाल एयरलाइन्सको केन्द्रीय कार्यालय तथा ट्राभल एजेन्सीमार्फत टिकट सहजै प्राप्त गर्न सकिनेछ । साथै, नेपालसँग सम्झौता गरेका अन्तर्राष्ट्रिय एयरलाइन्सले पनि नेपाल एयरलाइन्सको टिकट काट्न सक्नेछन् ।
यस्तो टिकट बिक्रीबापत हुने आम्दानी ट्रान्जिट दूरीलाई आधार मानेर नेपाल एयरलाइन्स र साझेदार एयरलाइन्स कम्पनीहरूले बाँडेर लिनेछन् । उदाहरणका लागि, नेपालबाट लन्डन जाने यात्रुलाई दुबईसम्म नेपाल एयरलाइन्सले बोक्नेछ भने दुबईबाट लन्डनसम्म इमिरेट्स एयरले बोक्नेछ ।
