- वि.सं २o८१ बैशाख ३० आइतबार
नबिल बैंक र सहजबीच प्रदेश १ मा रहेका साना तथा मध्यम कृषि उद्यमलाई वित्तीय पर्वद्धन एवं सुदृढीकरण गर्ने सम्झौता भएको छ । सम्झौतामा बैंकका प्रमुख कार्यकारी अधिकृत अनिल केशरी शाह र स्विस कन्ट्याक्ट नेपालका कन्ट्री डाइरेक्टर सञ्जय कार्कीले हस्ताक्षर गरेका हुन् ।
बैंकले प्रमुख एजेन्सीका रूपमा स्विस कन्ट्याक्ट र वातावरणीय तथा कृषिनीति अनुसन्धान, विस्तार र विकास केन्द्रद्वारा कार्यान्वयन गरिएको स्विस एजेन्सी फर डेभलपमेन्ट एन्ड कोअपरेसन (एसडिसी) परियोजना सहजबीच प्रदेश १ मा वित्तीय समावेशीकरण वृद्धि गरी कृषि उद्यम पर्वद्धन गर्दै कृषि क्षेत्रको सुदृढीकरण गर्ने उद्देश्यले सम्झौता गरेको जनाएको छ । यसैअनुसार बैंक र सहजबीच परियोजना तयार गरिएको जनाइएको छ ।
सम्झौतापछि बैंकका प्रमुख कार्यकारी अधिकृत शाहले बैंकले सदैव वित्तीय समावेशीकरणलाई प्राथमिकता दिँदै आएको र कृषि क्षेत्रमा गरीने कर्जा प्रवाहले नेपालको अर्थतन्त्रको दिगो विकासमा महत्वपूर्ण भूमिका निर्वाह गर्ने बताए । त्यस्तै, स्विस कन्ट्याक्ट नेपालका कन्ट्री डाइरेक्टर कार्कीले जनता र समुदायको जीवनमा सुधार गर्ने दिगो अवसर सिर्जना गर्न एवं त्यसलाई आकार दिन निजी क्षेत्रका संस्थाहरू र सम्बन्धित सरोकारवालासँग साझेदारीमा विश्वास रहेको बताए ।
बैंकले देशभरमा एक सय ३५ शाखा, एक सय ८८ एटिएम, सातवटा एक्सटेन्सन काउन्टर एक हजार पाँच सयभन्दा बढी नबिल रेमिट एजेन्टमार्फत सेवा दिइरहेको जनाएको छ ।
