- वि.सं २o७८ कार्तिक ६ शनिबार
भारतको नीति आयोगका उपाध्यक्ष राजीव कुमारले अमेरिकाको टेस्ला कम्पनीलाई विद्युतीय गाडी भारतमा आएर निर्माण गर्न आग्रह गरेका छन् । उनले कम्पनीलाई भारत सरकारका तर्फबाट करको लाभ दिनेसमेत आश्वासन दिएका छन् ।
पब्लिक अफेयर्स फोरम अफ इन्डियाको एक भर्चुअल कार्यक्रमलाई सम्बोधन गर्ने क्रममा कुमारले टेस्लाका उत्पादन भारतमा नपठाउन आग्रह गरेका छन् । अमेरिकामा बनेका विद्युतीय गाडी भारत पठाउँदा भारतमा रोजगारी सिर्जना नहुने भन्दै उनले भारतमै उत्पादन गर्न जोड दिएका हुन् ।
इकोनोमिक टाइम्सले राजीवलाई उद्धृत गर्दै लेखेको छ, ‘तपाईंहरू भारतमा आउनुस् । भारतमा निर्माण गर्नुहोस् । तपाईंहरूले चाहेअनुसार करको सुविधा हामी प्रदान गर्न तयार छौँ ।’ उनले भारतमा उत्पादित विद्युतीय गाडीहरूलाई निर्यातका लागि बजार निर्माण गर्नेसमेत आश्वासन दिएका छन् । ‘यसका लागि हामी अघि बढिसकेका छौँ,’ उनले भनेका छन् ।
भारतका सडक यातायातमन्त्री नितिन गड्करीले पनि यसअघि टेस्लालाई भारतमा विद्युतीय गाडी निर्माण गर्न आग्रह गर्दै आएको इकोनोमिक टाइम्सले लेखेको छ । गडकरीले कम्पनीलाई सबै प्रकारको सहयोग भारत सरकारबाट हुने आश्वासन यसअघि नै दिइसकेका छन् । अघिल्लाे महिना भारतको उद्योग मन्त्रालयले टेस्लालाई करका विषयमा निर्णय हुनुअघि नै भारतमा उत्पादन कार्य अघि बढाउन आग्रह गर्दै पत्र लेखिसकेको थियो ।
