१८औँ वार्षिकोत्सव विशेषांकफ्रन्ट पेजमुख्य समाचारसमाचारनयाँ यात्रा २०२५दृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २o७८ असोज २५ सोमबार
  • Sunday, 06 July, 2025
२o७८ असोज २५ सोमबार o६:२९:oo
Read Time : < 1 मिनेट
समाचार प्रिन्ट संस्करण

नयाँ घरमा दसैँ मनाउने पहिरोपीडितको सपना अधुरै

Read Time : < 1 मिनेट
नयाँ पत्रिका
२o७८ असोज २५ सोमबार o६:२९:oo

एक वर्षदेखि टहरामै जीवन निर्वाह गर्दै आएका मर्स्याङ्दी  गाउँपालिका–३ पल्लोटारीका पहिरोपीडितको नयाँ घरमा दसैँ मनाउने सपना अधुरै भएको छ । प्रदेश सरकारले पीडितका लागि नयाँ बनाइदिने घोषणा गरेको थियो । सरकारको सोही घोषणाका कारण पीडितले घरको जग खन्न सुरु गरे । कसैले डिपिसी ढलानसमेत गरे । तर, अनुदानका लागि सम्झौतासमेत नभएपछि पीडितहरू दसैँमा समेत त्रिपालमुनि बस्न बाध्य छन् ।

समयमै घर निर्माण गर्ने सम्झौता नहुँदा दसैँअघि नयाँ घरमा सर्ने उनीहरूको सपना पूरा नहुने भएको हो । ‘नयाँ घरमा सर्ने र दसैँ मनाउने ठूलो सपना थियो,’ पहिरोपीडित विष्णुमाया अछामीले भनिन्, ‘दुई वर्षको दसैँ टहरामै बित्ने भयो । पहिरो गएलगत्तै सरकारका प्रतिनिधिले घर बनाउने आश्वासन दिए पनि पीडितले अहिलेसम्म घर पाएका छैनन् । ७ र ८ साउन ०७७ मा पल्लोटारीमा पहिरोले २१ घर पुरेको थियो । ५४ घर उच्च जोखिममा परे । गाउँका चार सयजना एकैपटक विस्थापित भएका थिए । उनीहरूलाई तत्काल उद्धार गरी तरापुको देवीथानमा राखियो । संघ, प्रदेश, स्थानीय सरकार, विभिन्न संघसंस्था, स्थानीयको सहयोगमा अस्थायी टहरा निर्माण गरिएको थियो ।

पटक–पटक सरकारका प्रतिनिधिले घर बनाउने आश्वासन सुनाए । एक वर्ष बित्यो, तर पीडितको नयाँ घरमा बस्ने सपना भने पूरा भएन । ‘सरकारका प्रतिनिधिले वैशाखमा नयाँ घरको चाबी दिन्छौँ भनेर भाषण गरेका थिए,’ पहिरोपीडित जमुना अधिकारीले भनिन्, ‘हिउँद बित्यो, बर्खा पनि बित्यो, नयाँ घर बनाउन सम्झौतासमेत हुन सकेको छैन ।’ पहिरोमा परी घाइते भएकी सिर्जना गोतामे आफूहरू एक वर्षदेखि टहरामै बसेको बताउँछिन् । उनी भन्छिन्, ‘पहिरोले घर नै पुरियो, दसैँमा नयाँ घरमा बस्ने सपना अधुरै भयो ।’ मर्स्याङ्दी गाउँपालिका–३ का वडाअध्यक्ष प्रेम बस्नेतले पहिरोपीडितका लागि घर बनाउन जग्गाको व्यवस्थापन भइसकेको बताए ।