- वि.सं २o७८ श्रावण १५ शुक्रबार
बेलायतले युरोप र अमेरिकाबाट आउने यात्रुका लागि लगाएको प्रतिबन्ध हटाएको छ । ती राष्ट्रबाट आउने यात्रुमाथि लगाइएको प्रतिबन्ध २ अगस्टपछि लागू नहुने सरकारका एक उच्च अधिकारीले बताएका छन् ।
उनका अनुसार यसरी आउने यात्रुहरूले कोरोनाविरुद्धको खोपको दुवै मात्रा भने लगाएको हुनुपर्नेछ । यो नियम आगामी सोमबार अर्थात् २ अगस्टबाट लागू हुनेछ ।
युरोपियन मुलुकहरूबाट आउनेहरूले दुवै डोज खोप लगाएको प्रमाणस्वरूप ‘इयू डिजिटल कोभिड प्रमाणपत्र’ र अमेरिकाबाट आउनेहरूले ‘सिडिसी’ कार्ड उपलब्ध गराउनुपर्नेछ । तर, यात्रा गर्नुअघि र बेलायत आएको दोस्रो दिनमा भने यात्रुहरूले अनिवार्य पिसिआर परीक्षण गर्नुपर्नेछ ।
अहिले बेलायत प्रवेश गर्दा फ्रान्सबाहेकका ‘पहेलो सूची’अन्तर्गतका मुलुकका यात्रुहरूले आइसोलेसन बस्नु नपर्ने नियम छ । नयाँ नियमसँगै लामो समयदेखि आफ्ना परिवारबाट टाढिएका व्यक्तिहरूसँग भेट्न पाउने सरकारले जनाएको छ ।
पछिल्लो समय बेलायतमा कोरोना संक्रमण दर बढे पनि यसको असर कम भएको सरकारको भनाइ छ । यहाँको जनजीवन सामान्य बनाउन सरकारले प्रतिबन्धहरू क्रमशः खुकुलो पार्दै जाने जनाएको छ ।
