- वि.सं २o७७ मङ्सिर १६ मंगलबार
रसुवामा दुई अस्पताल भवन शिलान्यास गरिएको छ । नौकुण्ड गाउँपालिका र कालिका गाउँपालिकाले अस्पताल भवनको शिलान्यास गरेका हुन् ।
गुणस्तरीय आधारभूत स्वास्थ्य सेवामा नागरिकको पहुँच सुनिश्चित गर्ने उद्देश्यका साथ जिल्लाका तीन स्थानीय तहमा अस्पताल निर्माण हुन लागेको हो । आमाछोदिङ्माे गाउँपालिकामा भने जग्गा अभाव र जग्गा प्राप्तिका लागि आवश्यक प्रक्रिया सुरु गरेको हुँदा सोमबार भवन शिलान्यास हुन सकेन । एक साताभित्र आवश्यक प्रक्रिया सम्पन्न गरी शिलान्यास गरिने आमाछोदिङ्माे गाउँपालिकाका अध्यक्ष बुचुङ तामाङले बताए ।
नौकुण्ड गाउँपालिका– ३ स्थित निर्माण गरिन लागेको अस्पतालको प्रतिनिधिसभामा रसुवाबाट निर्वाचित सांसद इन्जिनियर मोहन आचार्यले शिलान्यास गरेका छन् ।
कालिका गाउँपालिकामा निर्माण हुन लागेको अस्पतालको भने गाउँपालिकाका अध्यक्ष सीताकुमारी पौडेल अधिकारीबाट शिलान्यास भएको छ । नौकुण्ड गाउँपालिकामा पाँच शय्याको अस्पताल निर्माण हुनेछ भने आमाछोदिङ्माे र कालिका गाउँपालिकामा १५–१५ शय्याको अस्पताल निर्माण हुनेछ ।
चालू आर्थिक वर्ष ०७७/७८ को नीति तथा कार्यक्रममा सबै स्थानीय तहमा पाँचदेखि १५ शय्यासम्मका आधारभूत अस्पताल स्थापना गर्ने नीतिअनुरूप देशभरका तीन सय ९६ स्थानीय तहमा अस्पताल निर्माणको प्रारम्भ गरिएको छ ।
