- वि.सं २o७७ मङ्सिर ९ मंगलबार
छैटौँ राष्ट्रिय उद्योग दिवसको अवसरमा लमजुङमा तीनजना महिला उद्यमीलाई सम्मान गरिएको छ । घरेलु तथा साना उद्योग कार्यालय लमजुङले जिल्लाका सफल तीन महिला उद्यमीलाई सम्मान गरेको हो ।
सम्मानित हुनेमा बेसीसहर नगरपालिका– ८ शेराकाे सिलवाल हस्तकला ट्रेनिङ सेन्टरकी पुन्यकुमारी सिलवाल, बेसीसहर नगरपालिका– २ मा रहेको रोज नर्सरीका सञ्चालक मर्स्याङ्दी गाउँपालिका– २ की हुमा गुरुङ र मध्यनेपाल नगरपालिकामा रहेको रिभर साइड ह्यान्डिक्राफ्ट उद्योग तथा सिलाइबुनाइ तालिम केन्द्रकी अनिता गुरुङ सम्मानित भएका हुन् ।
उनीहरूलाई जिल्ला समन्वय समितिका प्रमुख लोकराज पाण्डे र प्रमुख जिल्ला अधिकारी कृष्णप्रसाद शर्माले दोसल्लासहित प्रमाणपत्रले सम्मान गरेका थिए । दिवसको अवसरमा कार्यक्रममा कार्यालय प्रमुख टोपलाल भुसालले जिल्लामा हालसम्म तीन हजार नाै सय ३८ उद्योग दर्ता भएको र चार सय १३ उद्योग खारेज भएको बताए ।
उनका अनुसार जिल्लामा आ.व. ०७१/०७२ देखि हालसम्म सात हजार चार सय ७९ जनाले रोजगार पाएका छन् ।
