मृतक डाक्टरका परिवारलाई क्षतिपूर्ति दिनुपर्ने माग
भैरहवास्थित युनिभर्सल कलेज अफ मेडिकल साइन्सेजको काठमाडौंमा रहेको सम्पर्क कार्यालयमा तालाबन्दी गरिएको छ । उपचारमा गरिएको चरम लापरबाहीका कारण ज्यान गुमाएका युनिभर्सलमै कार्यरत अर्थोपेडिक्स सर्जन डा. ज्ञानेश्वरप्रसाद सिंहको परिवारलाई क्षतिपूर्ति नदिएको भन्दै केही चिकित्सकले बुधबार तालाबन्दी गरेका हुन् ।
डा. चेतन बस्नेत, डा. अच्युत भट्ट र डा. विनयकुमार पञ्जियारले संयुक्त विज्ञप्ति जारी गर्दै पीडित पक्षलाई क्षतिपूर्ति उपलब्ध गराउनुको साटो उल्टै धम्क्याउने गरेकाले युनिभर्सलको कमलादीस्थित सम्पर्क कार्यालयमा तालाबन्दी गर्नुपरेको बताएका छन् ।
‘दोषीलाई कारबाही र पीडित पक्षलाई राहत दिलाउनका निम्ति हामी आठ महिनादेखि निरन्तर संघर्षरत छौँ । पटक–पटक सम्पर्क गर्न खोज्दा पनि अस्पताल प्रशासन सम्पर्कमा नआउने र उल्टै फोन गरेर धम्कीपूर्ण ढंगले कुरा गर्ने अवस्था देखियो । अन्तमा हामी हाम्रो निरन्तरको संघर्षलाई सार्थक रूप दिन आज (बुधबार) तालाबन्दी गर्न बाध्य भएका छौँ,’ चिकित्सकहरूले जारी गरेको विज्ञप्तिमा भनिएको छ ।