मुख्य समाचारफ्रन्ट पेजसमाचारदृष्टिकोणअर्थअन्तर्वार्तामल्टिमिडियाखेलकुदविश्वप्रवासकोरोना अपडेटकर्नर किकसम्पादकीयस्वास्थ्य र जीवनशैली१३औँ वार्षिकोत्सव विशेषांकफिचरलाेकसेवा१४औँ वार्षिकोत्सव विशेषांकप्रेरक प्रसंग१२औँ वार्षिकोत्सव विशेषांकसप्तरंगटर्निङ प्वाइन्ट्स-२०१९टर्निङ प्वाइन्ट्स-२०२०प्रदेशब्लगEnglishटर्निङ प्वाइन्ट्स-२०२१
  • वि.सं २०७८ जेठ ३० आइतबार
  • Sunday, 13 June, 2021
२०७७ भदौ २२ सोमबार ०४:००:००
Read Time : > 1 मिनेट
फ्रन्ट पेज प्रिन्ट संस्करण

सुकुम्बासी दलितको उपचारमा ११ लाखको बिल : तिर्न नसक्दा अस्पतालले शव दिएन, परिवारले दाहसंस्कार गर्न पाएन

Read Time : > 1 मिनेट
२०७७ भदौ २२ सोमबार ०४:००:००

निजी अस्पतालमा उपचार खर्च तिर्न नसक्दा एउटा सुकुम्बासी दलित परिवार आफन्तको शव दाहसंस्कार गर्नबाट वञ्चित भएको छ । उपचारकै क्रममा मृत्यु भएका सप्तरी महुली गाउँपालिका– ६ मोहनपुरका ६७ वर्षीय सनमन सार्की अछामीको शव विराटनगरस्थित नोबेल मेडिकल कलेज टिचिङ अस्पतालमा छ । ६१ वर्षकी सीता श्रीमान्को मृत्युपछि बेहोस छिन् । 

अस्पताल प्रशासन र फार्मेसीले अछामीको उपचारमा ११ लाखको बिल उठाएका छन् । र, बिल तिर्न नसकेपछि अस्पताल प्रशासनले शव उठाउन दिएको छैन् । शव लैजान नपाएपछि परिवार आफन्तको दाहसंस्कार गर्नबाट वञ्चित भएको छ । उनको १९ भदौमा अस्पतालमा मृत्यु भएको थियो । बिल तिर्न नसकेपछि अस्पतालले दाहसंस्कारका लागि शव उठाउन नदिएको जेठा छोरा नवीनले बताए । 

उच्च रक्तचापले थलिएका सनमनको ५ चैतदेखि नोबेल अस्पतालमा उपचार हुँदै आएको थियो । उनलाई २५ दिन आइसियू र चार दिन भेन्टिलेटरमा राखेर उपचार गरिएको थियो । उपचारबापत अस्पताल प्रशासनको पाँच र औषधिको ६ लाख बिल उठेको छोरा नवीनले बताए । 

तत्काल बिल तिर्ने कुनै उपाय नभएकाले शव उठाउनका लागि परिवारले अस्पताल प्रशासनसँग हारगुहार गरेको छ । तर, अस्पताल प्रशासनले केही पुनर्विचार गरेको छैन । ‘बुबाको शव दिनुस् भनेर रोइकराइ गरिरहेको छु, तर अस्पताल प्रशासनले बिल नतिरी शव दिन मानेको छैन । बुबाको दाहसंस्कार र काजकिरिया सबै रोकियो,’ नवीनले भने, ‘बिल तिर्न एक पैसा छैन ।’

अस्पतालका जनसम्पर्क अधिकृत नारायण दाहालले तिर्नुपर्ने शुल्क धेरै भएकाले प्रशासनले निर्णय गर्न सक्ने अवस्था नभएको बताए । दाहालले भने, ‘यसबारे अध्यक्षले मात्र निर्णय दिन सक्नुहुन्छ । हाम्री केही गर्न सक्दैनौँ ।’ 

मृतकको जायजेथाबाट असुलउपर गर्न सकिन्छ कि भनेर अस्पताल र फार्मेसीका प्रतिनिधि महुलीस्थित उनको घरमा समेत पुगेका थिए । नवीनका अनुसार सुकुम्बासी परिवार भएकाले असुलउपर गर्न सक्ने अवस्था नभएपछि उनीहरू चुपचाप फर्किएका थिए । फर्केपछि अस्पताल प्रशासनले पैसा तिरे मात्र शव दिने भन्दै मृतकको परिवारमाथि दबाब दिइरहेको छ । 

मृतक सनमनको परिवार सुकुम्बासी बस्तीमा बस्छ, दैनिक ज्याला मजदुरी गरेर जीवन गुजारा चलाउँछ । मृतकका जेठा छोरा २७ वर्षीय नवीन र कान्छा छोरा २४ वर्षीय कुमार दुवै मिस्त्री काम गर्छन् । आर्थिक अभावकै कारण एक बहिनीको बिहे हुन सकेको छैन । नवीनले भने, ‘उपचार गर्दा–गर्दा ऋण मात्रै तीन लाख पुग्यो । अरू हामीसँग एक पैसा छैन, जायजेथा पनि छैन । कसरी ११ लाखको बिल तिर्नु ?’ 

तीन दिनदेखि अस्पतालबाट बुबाको शव उठाउन नपाएका छोरा नवीन थाकिसकेका छन् । उनको अस्पताल प्रशासनसँग आग्रह छ, ‘बरु परिवारका सदस्यलाई जाकडी राख्नुस्, बुबाको शव लैजान्छौँ । दाहसंस्कार र काजकिरिया सक्छाँै । काम गरेर खाने परिवारलाई धेरै दुःख नदिनुस् ।’