मोदीले भारत भ्रमणको निमन्त्रणा गरेको प्रधानमन्त्री ओलीको दाबी

•  मोदीसँगको भेटपछि थाइल्यान्ड भ्रमणमा रहेका प्रतिनिधिमण्डलका उच्च अधिकारीसँग ओलीले सुनाएका थिए–मैले उहाँलाई (मोदीलाई) निमन्त्रणाको सम्झना गराएँ । मोदीजीले पहिले तपाईं भारत भ्रमणमा आउनुस्, त्यसपछि अनुकूल मिलाएर म नेपाल आउँछु भन्नुभएको छ ।
•  काठमाडौं ओर्लिएपछि विमानस्थलमा प्रधानमन्त्री ओलीले भने–सगरमाथा संवादलगायतका कारणले हामी अलिकति व्यस्त छौँ । तर, हामीले समय मिलायौँ भने भ्रमण सगरमाथा संवादअघि (सगरमाथा संवाद जेठ पहिलो साता हुँदै छ) पनि हुन सक्छ । 

प्रधानमन्त्री केपी ओलीले भारतीय प्रधानमन्त्री नरेन्द्र मोदीबाट भारत भ्रमणको निमन्त्रणा प्राप्त भएको उच्च सरकारी अधिकारीहरूलाई जानकारी गराएका छन् । पछिल्लोपटक प्रधानमन्त्री बनेको करिब नौ महिनापछि ओलीले भारत भ्रमणका लागि निमन्त्रणा पाएका हुन् । 

प्रधानमन्त्री ओलीका अनुसार मोदीले शुक्रबार थाइल्यान्डको बैंककमा भएको एकान्त भेटवार्ताका क्रममा उनलाई भारत भ्रमणको निमन्त्रणा दिएका हुन् । ‘मैले उहाँलाई (मोदीलाई) निमन्त्रणाको सम्झना गराएँ । मोदीजीले पहिले तपाईं भारत भ्रमणमा आउनुस्, त्यसपछि अनुकूल मिलाएर म नेपाल आउँछु भन्नुभएको छ,’ ओलीले प्रतिनिधिमण्डलमा रहेका उच्च अधिकारीसँग भनेका थिए । 

थाइल्यान्ड भ्रमण सकेर स्वदेश फर्किएपछि त्रिभुवन अन्तर्राष्ट्रिय विमानस्थलमा सञ्चारकर्मीले सोधेको प्रश्नमा प्रधानमन्त्री ओलीले जेठअघि नै भारत भ्रमण हुन सक्ने संकेत गरे । ‘सगरमाथा संवादलगायतका कारणले हामी अलिकति व्यस्त छौँ । तर, हामीले समय मिलायौँ भने भ्रमण सगरमाथा संवादअघि पनि हुन सक्छ,’ उनले भने । प्रधानमन्त्री ओलीले विमानस्थलमा औपचारिक निमन्त्रणा पाएकोबारे थप खुलाएनन् । बरु, यसअघि पनि भारत भ्रमणका लागि समस्या नरहेको उनले जिकिर गरे । ‘भारत भ्रमण असम्भव कुरा हो र ? असम्भव थियो र ? कतिपय कारणहरू (कहिले के काम पर्‍या हुन्छ, कहिले के काम),’ ओलीले भने, ‘भारत भ्रमण अवरुद्ध भो जस्तो बाहिर जे भनिएको छ, त्यस्तो होइन । भारत भ्रमण गर्न कसैले काँडेतार लगाएको छ र ? यसलाई ठिकै ढंगले बुझ्नुपर्छ ।’ 

शुक्रबारको वार्तामा ओलीले मोदीलाई सगरमाथा संवादका लागि दिएको निमन्त्रणा स्मरण गराएका थिए । नेपालले सरकारले २ देखि ४ जेठ ०८२ मा आयोजना गरेको सगरमाथा संवादमा सहभागी हुन असमर्थता जनाउँदै मोदीले ओलीलाई नै भारत आउन आग्रह गरेको बताइएको छ । प्रधानमन्त्री ओलीले मोदीलाई पठाएको औपचारिक निमन्त्रणापत्र दिल्लीस्थित नेपाली राजदूतावासमार्फत भारतीय विदेश मन्त्रालयलाई बुझाइसकेको छ । प्रधानमन्त्री ओलीले चिनियाँ प्रधानमन्त्री ली छ्याङलाई पनि सगरमाथा संवादमा सहभागी हुन बेइजिङस्थित नेपाली राजदूताासमार्फत निमन्त्रणा पठाएका छन् । 

छिमेकी चीनको भ्रमण सकेर फर्कने क्रममा प्रधानमन्त्री ओलीले २० मंसिरमा त्रिभुवन अन्तर्राष्ट्रिय विमानस्थलमा भारत भ्रमण ‘एरेन्ज गर्नुपर्छ’ भनेका थिए । उनले २३ मंसिरमा झापाको दमकस्थित व्यापारिक कम्प्लेक्स उद्घाटनका क्रममा भारत भ्रमणमा जाने उद्घोष गरेका थिए । ‘मान्छेहरूले पत्याएका छैनन् होला, तर केही समयपछि भारत भ्रमणमा पनि जाँदै छु,’ ओलीको भनाइ थियो । त्यसवेलासम्म ओलीलाई मोदीको निमन्त्रणा आइसकेको थिएन । 

प्रधानमन्त्री ओलीले नेपाल–भारत सीमासम्बन्धी समस्या तथा पाँच वर्षअघि तयार भएर थन्किएको नेपाल–भारत प्रबुद्ध व्यक्ति समूह (इपिजी)को प्रतिवेदन बुझ्ने विषयमा चर्चा गरेनन् । त्यसबारेमा मोदीसँग छलफल भए–नभएको उनले खुलाएनन् । यसैगरी नेपालको पछिल्लो राजनीतिक परिवेशबारे कुराकानी भए–नभएको पनि उल्लेख गरेनन् । तर, छिमेकमा समस्या देखिए तत्कालै संवाद गरेर टुंग्याउने समझदारी भएको ओलीले बताए । 

‘कहिलेकाहीँ छिमेकमा कुनै सानातिना समस्या देखिन पनि त सक्छन् नि ! त्यस्तो भइहालेमा तत्कालै संवाद गरिहाल्ने र तिनीहरूलाई टुंग्याउने भन्नेमा यसपटक गहिरो समझदारी गरेका छौँ,’ ओलीले भने, ‘भेटघाटबाट खुसी छु । कुराकानीबाट उहाँ पनि खुसी हुनुहुन्छ भन्ने मैले पाएको छु ।’ प्रधानमन्त्री ओलीको पछिल्लो कार्यकाल ३१ असारमा सुरु भएदेखि नै उनले भारत भ्रमणलाई प्राथमिकतामा राखेका छन् । तर, औपचारिक भ्रमणको चाँजोपाँजो अझै मिलेको छैन ।