- वि.सं २o८१ चैत २३ शनिबार
तीन खेलमा एक अंक जोडेपछि बुटवल लुम्बिनी एफसी तेस्रो नेपाल सुपर लिग (एनएसएल)मा दबाबमा परेको छ । शुक्रबार त्रिपुरेश्वरस्थित दशरथ रंगशालामा एफसी चितवनसँग १–० ले पराजित भएपछि बुटवलको प्लेअफ सम्भावना कमजोर बन्यो । एरिक विष्ट कप्तान रहेको बुटवल पहिलो खेलमा झापा एफसीविरुद्ध गोलरहित बराबरी खेलेको थियो ।
दोस्रो खेलमा भने दुईपटकको उपविजेता धनगढी एफसीविरुद्ध बुटवल अप्रत्याशित रूपमा ४–१ ले पराजित भयो । यता अञ्जन विष्ट मार्की रहेको चितवन भने लयमा देखिएको छ । टोली लगातार दोस्रो जित निकाल्दै शीर्ष स्थानमा उक्लियो । चितवनले पहिलो खेलमा पोखरा थन्डर्सविरुद्ध २–० को जित निकालेको थियो ।
लगातार दोस्रो जित निकाल्ने क्रममा चितवनका लागि अट्याकिङ मिडफिल्डर टोरिक जेब्रिनले निर्णायक गोल गरेका थिए । १२ मिनेट थपिएको इन्जुरी समयमा घानाका जेब्रिनले बक्सबाहिरबाट सानदार गोल गरेका थिए । जेब्रिनको प्रहार बुटवलका गोलकिपर दीप कार्कीले रोक्नै सकेनन् । यसअघि चितवन र बुटवलको सुन्दर फ्रिकिक प्रहार गोल नहुँदा खेल बराबरीतर्फ अग्रसर भएको थियो । तर, इन्जुरी समयमा भने चितवन गोल गर्दै तीन अंक जोड्न सफल भएको हो ।
