मुख्य समाचारफ्रन्ट पेजसमाचारनयाँ यात्रा २०२५दृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २o८१ चैत २३ शनिबार
  • Saturday, 05 April, 2025
नयाँ पत्रिका काठमाडाैं
२o८१ चैत २३ शनिबार १o:५o:oo
Read Time : > 1 मिनेट
खेलकुद प्रिन्ट संस्करण

राष्ट्रिय रग्बी फिफ्टिन्स च्यासल मैदानमा

Read Time : > 1 मिनेट
नयाँ पत्रिका, काठमाडाैं
नयाँ पत्रिका
२o८१ चैत २३ शनिबार १o:५o:oo

राष्ट्रिय पुरुष रग्बी फिफ्टिन्स च्याम्पियनसिप चैतको तेस्रो साता च्यासल मैदानमा हुने भएको छ । नेपाल रग्बी संघको आयोजनामा राष्ट्रिय फिफ्टिन्स च्याम्पियनसिप २७ चैतदेखि २ वैशाखसम्म ललितपुरको च्यालस मैदानमा हुनेछ । प्रतियोगितामा तीन विभागीय टोलीसहित गोर्खाली रग्बी क्लब सहभागी हुनेछ । महासंघका महासचिव गोविन्द घिमिरेले सेभेन्सको तुलनामा फिफ्टिन्स प्राविधिक रूपमा पनि उत्कृष्ट खेलाडीले मात्र प्रतिपस्पर्धा गर्ने भएकाले तीन विभागीय र नेपाली रग्बी इतिहासमा सबैभन्दा पुरानो क्लब गोर्खालीलाई मात्र समावेश गरिएको बताए । 

संघका वरिष्ठ उपाध्यक्ष चेतनराज गिरीले पनि यस विधाको खेल खेल्न एक निश्चित उमेरसमूह र लामो समयदेखि अभ्यस्त खेलाडीलाई मात्र सहज हुने भएकाले सीमित प्रतिस्पर्धा तय गरिएको उल्लेख गरे । त्यसैले पनि यस प्रतियोगितामा विदेशी निर्णायक नै झिकाइएको उनको भनाइ थियो । यस प्रतियोगिताको मुख्य निर्णायकमा श्रीलंकाका प्रियान्था गुनारथन रहने रग्बी संघले जनाएको छ ।

साथै, म्याच रेफ्री पनि श्रीलंकाकै सुरंगा अरुणा थालगालागेले भूमिका निर्वाह गर्ने भएका छन् । नेपालका प्रेमबहादुर कोइरालाले प्रतियोगिता खेलाउने संघले उल्लेख गरेको छ । यस प्रतियोगिताका लागि फिफ्टिन्स रग्बी क्लबले गत एक महिनादेखि नै बन्द प्रशिक्षण गरिरहेको संघका महासचिव घिमिरेले जानकारी दिए । संघले अघिल्लो वर्षदेखि यस प्रतियोगिताको ट्रफीलाई रनिङ सिल्डका रूपमा सञ्चालन गरेको थियो । यस वर्ष पनि त्यसलाई निरन्तरता दिइएको छ । गत वर्षको विजेता गोर्खाली रग्बी क्लब हो । सहभागी चारै क्लबलाई तयारी तथा प्रतियोगितामा बिमा र स्वास्थ्य व्यवस्थापनसहित तीन लाखबराबरको रकम प्रदान गरिएको संघले जनाएको छ ।

खेलाडीका लागि तीन लाखबराबरको खेल दुर्घटना बिमा पनि गरिएको संघले जनाएको छ । प्रतियोगिताको विजेताले दुई लाख २२ हजार दुई सय २२ रुपैयाँसहित रनिङ सिल्ड पाउनेछ । उपविजेताले भने एक लाख ११ हजार एक सय ११ रुपैयाँसहित पदक प्राप्त गर्ने संघले जनाएको छ । यस प्रतियोगिताको उत्कृष्ट खेलाडीले १५ हजार नगदसहित ट्रफी पाउनेछ । आगामी वर्षको वैशाख २० देखि २२ गतेसम्म नेपालमै हुने नेपाल बंगलादेश अन्तर्राष्ट्रिय रग्बी सिरिजका लागि नेपाली टोलीको तयारी गरिने संघले जनाएको छ ।