- वि.सं २o८१ फाल्गुण २६ सोमबार
किरण ठगुन्नाको शतकीय पारीको मद्दतमा सुदूरपश्चिम प्रदेशले यहाँ जारी प्रधानमन्त्री कप पुरुष राष्ट्रिय क्रिकेट प्रतियोगितामा गण्डकी प्रदेशलाई पराजित गरेको छ। सुदूरपश्चिमले गण्डकीलाई ६ विकेटले हराएको हो। यसअघि सुदूरपश्चिम पहिलो खेलमा कर्णाली प्रदेशसँग पराजित भएको थियो।
दाङको लमही क्रिकेट रंगशालामा टस जितेर पहिला ब्याटिङ गरेको गण्डकी प्रदेशले निर्धारित ५० ओभरको खेलमा आठ विकेटको क्षतिमा २२० रन बनायो। २२१ रनको विजयी लक्ष्य सुदूरपश्चिमले ४३ ओभरमा चार विकेटको क्षतिमा पूरा गर्यो । सुदूरपश्चिमका ठगुन्नाले अविजित १२१ रन बनाए। उनले १०१ बल खेल्दै नौ चौका र ६ छक्का प्रहार गरे। यस्तै, कप्तान नारायण जोशीले अविजित ३८, खडक बोहराले १९ तथा निश्चल क्षेत्रीले १८ रनको योगदान दिए।
बलिङतर्फ गण्डकीका विपिन खत्री, अमृत गुरुङ, कमल परियार र अर्जुन कुमालले एक–एक विकेट लिए।
यसअघि २२० रन बनाउने क्रममा गण्डकीका लागि अर्जुन कुमाल र दीपक डुम्रेले अर्धशतकीय पारी खेले। दीपकले ७४ बल खेल्ने क्रममा तीन चौका र एक छक्का हान्दै ६० रन बनाए। यस्तै, अर्जुनले ९५ बलमा ५७ रनको योगदान दिए। उनले यस क्रममा चार चौका र एक छक्का प्रहार गरे।
यसैगरी, सुदीप अर्यालले अविजित २३, दिनेश बुढामगरले १५ तथा अमृत गुरुङ र विपिन खत्रीले १०–१० रनको योगदान दिए।
बलिङतर्फ सुदूरपश्चिमका लागि शेर मल्लले तीन, नारायण जोशीले दुई तथा हेमन्त धामी, मिलन बोहरा र अर्जुन विकले एक–एक विकेट लिए। सोमबारदेखि सुरु भएको प्रधानमन्त्री कप क्रिकेटमा सात प्रदेश र तीन विभागीय टोली सहभागी छन्। राउन्ड रोबिनका आधारमा खेलाइने प्रतियोगितामा अंकका आधारमा शीर्ष चार टोली सेमिफाइनल प्रवेश गर्नेछन्।
