१० यात्रु बोकेको विमान अमेरिकाकाे अलास्का क्षेत्रबाट बेपत्ता

अमेरिकाको उत्तरपश्चिमी राज्य अलास्कामा १० जना यात्रु बोकेको एउटा सानो व्यावसायिक विमान बेपत्ता भएको छ। विमान दुर्घटना भएको आशंका गरिएको छ।

अलास्का राज्य प्रहरीका अनुसार नौ यात्रु र एक पाइलट सवार बेरिङ एयर क्याराभान अलास्काको स्थानीय समयअनुसार अपराह्न ४ बजे उनालाक्लिटबाट नोमतर्फ उड्दै गर्दा बेपत्ता भएको हो।

यी दुई सहरहरू नोर्टन साउन्डमा एक–अर्काबाट लगभग १४६ माइल (२३५ किलोमिटर)को दूरीमा अवस्थित छन्। खोजी तथा उद्धारकर्मीहरूले विमानको अन्तिम जानकारी प्राप्त गर्न काम गरिरहेको अधिकारीहरूले एक विज्ञप्तिमा बताएका छन्।

हराएको यो विमान संयुक्त राज्य अमेरिकामा हालै भएको उड्डयन विपत्तिको पछिल्लो घटना हो। गत जनवरी ३० मा राजधानी वासिङ्टनमा अमेरिकी सेनाको हेलिकाेप्टरसँग यात्रुवाहक विमान ठोक्किँदा विमानमा सवार सबै ६७ यात्रुको मृत्यु भएको थियो।

फिलाडेल्फियाको व्यस्त इलाकामा अर्को एक मेडिकल विमान दुर्घटना हुँदा सातजनाको मृत्यु हुनुका साथै १९ जना घाइते भएका थिए।