- वि.सं २o८१ माघ २० आइतबार
चीनले अमेरिकी राष्ट्रपति डोनाल्ड ट्रम्पद्वारा बेइजिङमाथि लगाइएको नयाँ करको ‘दृढतापूर्वक विरोध’ गरेको र ‘आफ्नो अधिकार र चासोको दृढतापूर्वक रक्षा गर्न सम्बन्धित जवाफी कदम’ चाल्ने वाचा गरेको बताएको छ।
शनिबार प्रमुख व्यापार साझेदारहरूविरुद्ध व्यापक कदमहरू सार्वजनिक गर्दै ट्रम्पले चिनियाँ आयातमा विद्यमान शुल्कमा थप १० प्रतिशत कर लगाउने घोषणा गरेका थिए।
आइतबार एक विज्ञप्तिमा चीनको वाणिज्य मन्त्रालयले वासिङ्टनको ‘गलत अभ्यासहरू’को आलोचना गर्दै बेइजिङ ‘यसप्रति अत्यन्त असन्तुष्ट र दृढतापूर्वक विरोध गर्दछ’ भनेको छ। मन्त्रालयले विश्व व्यापार संगठन (डब्लुटिओ)मा मुद्दा दायर गर्ने र ‘संयुक्त राज्य अमेरिकाले एकपक्षीय रूपमा लगाएको करले संगठनका नियमहरूको गम्भीर उल्लंघन गर्ने’ तर्क गरेको छ।
‘यी शुल्कहरू अमेरिकाको आफ्नै समस्याहरू समाधान गर्न मात्र असहयोगी नभई सामान्य आर्थिक र व्यापारिक सहयोगलाई पनि कमजोर बनाउँछन्,’ मन्त्रालयले भनेको छ, ‘संयुक्त राज्य अमेरिकाले अन्य देशहरूलाई हरेक पालोमा कर लगाउने धम्की दिनुको सट्टा फेन्टानिलजस्ता आफ्नै मुद्दाहरूलाई वस्तुनिष्ठ र तर्कसंगत रूपमा हेर्ने र व्यवहार गर्नेछ भन्ने चीनलाई आशा छ।’
‘बेइजिङले अमेरिकालाई आफ्नो गलत अभ्यासहरू सुधार गर्न, आफ्ना समस्याहरूको सामना गर्न, स्पष्ट संवाद गर्न, सहयोगलाई बलियो बनाउन र समानता, आपसी लाभ र आपसी सम्मानको आधारमा मतभेदहरू व्यवस्थापन गर्न आग्रह गर्दछ,’ विज्ञप्तिमा उल्लेख छ।
‘व्यापार युद्ध वा भन्सार युद्धमा कुनै विजेता नहुने भन्दै चीनको विदेश मन्त्रालयले भनेको छ, ‘थप भन्सार महसुल लगाउने अभ्यास रचनात्मक छैन र यसले लागुऔषध नियन्त्रणमा भविष्यको द्विपक्षीय सहयोगलाई अनिवार्य रूपमा प्रभावित र क्षति पुर्याउनेछ।’
