‘नेपाल ग्रामीण चलचित्र महोत्सव’को चौथो संस्करण हुँदै

‘नेपाल ग्रामीण चलचित्र महोत्सव’को चौथो संस्करण आगामी वैशाखमा हुने भएको छ । सेलिब्रेटी नेपालले तीन वर्षदेखि आयोजना गर्दै आएको महोत्सवले पर्यटन प्रवर्द्धनसँगै नेपाली चलचित्रलाई ग्रामीण बजारमा पुर्‍याउने विश्वास लिइएको हो ।

महोत्सवका अध्यक्ष रघुनाथ सापकोटाले भने, ‘महोत्सवमा नेपाली मौलिक ग्रामीण कथावस्तुमा बनेका चलचित्र समावेश गर्दै आएका छौँ । यसले चलचित्र भवन नभएका गाउँका दर्शकलाई पनि चलचित्रसँग जोड्छ भन्ने हाम्रो विश्वास छ । विगतका शृंखलाले पनि स्थानीयलाई चलचित्रसँग सामीप्यता बनाउन सघाएको पाएका छौँ ।’ उनले महोत्सवका लागि चलचित्र दर्ता आह्वान गरिएको बताउँदै वृत्तचित्र, छोटा चलचित्र, भाषाभाषीका चलचित्रलाई समावेश गरिने जानकारी दिए । 

‘आफ्नै गाउँ, आफ्नै ठाउँ, आफ्नै भाषा, आफ्नै चलचित्र’ भन्ने मूल नाराका साथ आयोजना हुने महोत्सवमा चलचित्र प्रदर्शनीसँगै अन्तर्क्रिया, कार्यशाला गोष्ठी आयोजना गरिने अध्यक्ष सापकोटाले बताए । गोरखाको लाप्राकबाट सुरु गरिएको महोत्सवको दोस्रो शृंखला काभ्रेपलाञ्चोकको भकुन्डेबेँसीमा र तेस्रो शृंखला रामेछापमा आयोजना गरिएको थियो ।