- वि.सं २o८१ मङ्सिर ३० आइतबार
पूर्व-पश्चिम सडकअन्तर्गत सिराहाको धनगढीमाई नगरपालिका–१०, जिरोमाइल खण्डमा शनिबार साँझ दुर्घटनामा परेको कारबाट प्रतिबन्धित लागुऔषध गाँजा बरामद भएको छ।
शनिबार साँझ पूर्वबाट पश्चिमतिर जाँदै गरेको ना.३ख ७५९१ नम्बरको ट्रक र उत्तरतिरबाट आएको बा.८च ९९६३ नम्बरको कार जिरोमाइलमा आपसमा ठोक्किएका थिए। दुर्घटनाबारे अनुसन्धान गर्दा प्रहरीले कारबाट गाँजा बरामद गरेको हो।
जिल्ला प्रहरी कार्यालय सिराहाका सूचना अधिकारी प्रहरी नायब उपरीक्षक वीरेन्द्रकुमार पासवानका अनुसार कारमा रहेको पाँचवटा कालो प्लास्टिकको पोकामा प्याक गरिएको एक सय ३० किलो गाँजा बरामद भएको हो।
दुर्घटनामा परेको कार, ट्रक तथा ट्रकचालक प्रहरी नियन्त्रणमा छन् भने कारमा रहेका अन्य व्यक्ति फरार रहेकाले खोजी भइरहेको उनले बताए। प्रत्यक्षदर्शीका अनुसार दुर्घटनामा परेलगत्तै कारचालक ओर्लिएर कारबाट गाँजाको पोका र नम्बर प्लेट झिकी अटोरिक्सामा लोड गर्न खोज्दै गर्दा दुर्घटना हेर्न वरपरका मानिसहरू आएपछि चालकसहित तीनजना गाँजाको पोका छोडेर भागेका थिए।
