- वि.सं २o८१ कार्तिक २३ शुक्रबार
चाडपर्वमा हुन सक्ने कृत्रिम मूल्यवृद्धि नियन्त्रण गर्न सञ्चालन गरिएको सुपथ पसलमा सामान्य अवधिको तुलनामा तीन–चार गुणा बढी बिक्री भएको संस्थानहरूको दाबी
- साल्ट ट्रेडिङद्वारा सात करोड ४८ लाखको कारोबार, तेल र चिनी धेरै बिक्री
- खाद्य कम्पनीद्वारा ४० करोडको खाद्यान्न बिक्री गर्दा डेढ करोड छुट
चाडपर्वमा खाद्यान्न खरिदमा उपभोक्तालाई सहुलियत दिने गरी सञ्चालन गरिएको सुपथ पसलमा ४७ करोड ४८ लाख रुपैयाँको कारोबार भएको छ ।
देशभर सुपथ पसल सञ्चालन गरेका साल्ट ट्रेडिङ कर्पोरेसन र खाद्य व्यवस्था तथा व्यापार कम्पनी लिमिटेडले मंगलबारसम्म सो कारोबार गरेका हुन् । साल्ट ट्रेडिङले सात करोड ४८ लाख र खाद्य कम्पनीले ४० करोड रुपैयाँबराबरको खाद्यान्न बिक्री गरेको जनाएका छन् । खाद्य कम्पनीले ३ असोजदेखि सुरु गरेको सुपथ पसल १ माघसम्म सञ्चालन गर्ने जनाएको छ भने साल्ट ट्रेडिङले छठसम्मका लागि ७ असोजदेखि सुपथ पसल सुरु गरेको थियो ।
साल्ट ट्रेडिङका सहायक महाप्रबन्धक कुमार राजभण्डारीले अन्य समयको तुलनामा सुपथ पसलमा उपभोक्ताको उत्साहजनक उपस्थिति दिएको बताए । ‘सुपथ पसलमा छुटसहित खाद्यान्न बिक्री गरिएकाले तुलनात्मक रूपमा धेरै कारोबार भयो,’ उनले भने, ‘साल्ट ट्रेडिङले देशभर ३८ भन्दा बढी स्थानमा राखेको सुपथ पसलबाट तेल र चिनीको बिक्री धेरै भयो ।’ उनका अनुसार अन्य दैनिक उपभोग्य वस्तुहरूको बिक्री पनि सामान्य अवधिको तुलनामा तीन–चार गुणा बढी भएको छ ।
खाद्य कम्पनीकी बिक्री प्रबन्धक अम्बिका पौडेलले छठसम्मको कारोबारबाट एक करोड ५५ लाख रुपैयाँबराबरको छुट मूल्यका खाद्यान्न बिक्री गरेको जानकारी दिइन् । सबैभन्दा धेरै ३० हजार क्विन्टल चामल बिक्री भइसकेको उनले जानकारी दिइन् । खाद्यले ५० हजार क्विन्टल चामल सुपथ मूल्यमा बिक्री गर्ने लक्ष्य राखेको छ । त्यस्तै, सात हजार पाँच सय लिटर तेल र एक हजार किलो दाल तथा गेडागुडी बिक्री भएको उनले बताइन् । खाद्य कम्पनीले ६३ स्थानमा सुपथ पसल सञ्चालन गरेको छ ।
पाँच करोडभन्दा बढी मूल्यका खसी–बोका र च्यांग्रा बिक्री भएको उनले जानकारी दिइन् । कम्पनीले तीन सय च्यांग्रा र १५ सय खसी–बोका ल्याएर बिक्री गरेको जनाएको छ । प्रतिकिलो १० रुपैयाँ छुट दिएर जिउँदो खसी–बोका प्रतिकिलो ६ सय ६० रुपैयाँ र च्यांग्रा प्रतिकिलो १२ सय २० रुपैयाँ मूल्य निर्धारण गरिएको थियो ।
चाडपर्वमा छुट मूल्यमा खाद्यान्न बिक्री गर्न सरकारले साल्ट ट्रेडिङलाई ८० लाख र खाद्य कम्पनीलाई तीन करोड रुपैयाँ अनुदान छुट्याएको थियो । सुपथ पसलमा चामल प्रतिकेजी पाँच रुपैयाँ तथा तेल, गेडागुडी, पिठो, मैदा, चिउरा, चिनी, क्वाँटी, कर्णालीको सिमी–गेडागुडी, फापर दाना, चिनो, कागुनो, उवा र जुम्ली मार्सीमा प्रतिकिलो सात रुपैयाँ छुट दिइएको थियो । चिनीमा पनि प्रतिकिलो पाँच रुपैयाँ छुट राखिएको थियो ।
चाडपर्वमा सुपथ मूल्य पसल सञ्चालन गर्दा कृत्रिम मूल्यवृद्धि नियन्त्रणमा सघाउ पुग्ने गरेको उपभोक्ता अधिकारकर्मी माधव तिमिल्सिना बताउँछन् । ‘सरकारले बर्सेनि चाडपर्वको अवसर पारेर सुपथ मूल्यमा खाद्यान्न बिक्री गर्ने गरेको छ । उपभोक्ता हितका दृष्टिकोणले यो सकारात्मक कदम हो,’ उनले भने, ‘आगामी वर्षमा पनि यो कामले निरन्तरता पाउनुपर्छ ।’
