नेपाल संवत् ११४५ को अवसरमा कावासोतीमा र्‍याली तथा शुभकामना आदानप्रदान

नेपाल संवत् ११४५ आज देशभर विविध कार्यक्रम आयोजना गरी मनाइयो । यस संवतलाई हाल नेवार समुदायले नयाँ वर्षका रूपमा मनाउने गरेका छन् । राष्ट्रिय विभूति शंखधर साख्वाले वि.सं. ९३७ (इ.सं. ८८०) मा गरिब जनताको ऋण मोचन गरी नेपाल संवतको सुरुवात गराएका थिए ।

नेवाः समुदायले नवलपुरको कावासोतीमा पनि र्‍याली तथा शुभकामना आदानप्रदान गरेर नेपाल संवत् ११४५ मनाएको छ । नेवाः देय् दबु नवलपुरको आयोजनामा आज कावासोतीमा र्‍यालीका साथै शुभकामना आदानप्रदान कार्यक्रम सम्पन्न भएको हो ।

शुभकामना कार्यक्रममा बोल्दै संविधान सभा सदस्य जीवन श्रेष्ठले नेपाल संवत् नेवारको मात्र नभएर नेपालको आफ्नै मौलिक संवत् भएको बताए । उनले नेपाल सम्वतका प्रर्वतक शंखधर साख्वा जस्तै बन्न नसके पनि उनको पथ पछ्याएर हिंड्न सक्ने हुनुपर्नेमा जाेड दिए।

कार्यक्रममा नेवाः देय् दबुका गण्डकी प्रदेश सचिव अर्जुन श्रेष्ठ, कोषाध्यक्ष भुवराज श्रेष्ठ, नेपाल आदिवासी जनजाति महासंघ नवलपुरका अध्यक्ष रामकुमार श्रेष्ठ, नेवाः देय दबु नवलपुरका वरिष्ठ उपाध्यक्ष मित्रलाल श्रेष्ठ लगायतको सहभागिता रहेको थियो । 

कार्यक्रममा सिका नेवा गुठीको धिमीबाजा प्रस्तुत गरिएको थियो । त्यसैगरी कार्यक्रममा नेवाः समुदायको सुगन र समे बजी वितरण गरिएको थियो । 

त्यसैगरी कावासोती २ भाट्टोला खेल मैदानमा भएको कार्यक्रम पछि कावासोती कोइलापानी, विपीचोक, थकाली चोक, पुरानो कावासोती, डण्डा, त्रिभुवनटार, गोछडा शेरगञ्ज हुँदै पुन कार्यक्रम स्थलसम्म मोटरसाइकल र्‍याली गरिएको थियो ।