ताप्लेजुङको मैवाखोलामा पौडी खेल्ने क्रममा बगेर दुई बालबालिका बेपत्ता भएका छन्।
मौवाखोला गाउँपालिका– २ खानीका ११ वर्षीय सञ्जय बराइली र १२ वर्षीया आइतारानी शेर्पालाई खोलाले बगाएको जिल्ला प्रहरी कार्यालय ताप्लेजुङले जनाएको छ।
जिल्ला प्रहरी कार्यालय ताप्लेजुङका सूचना अधिकारी विवेक बस्नेतका अनुसार सञ्जय मैवाखोला गाउँपालिका– २ खानीका सञ्जहाङ बराइलीका छोरा हुन् भने आइतारानी रिन्जिन शेर्पाकी छोरी हुन्।
दहमा पौडी खेल्ने क्रममा दुवैलाई खोलाले बगाएर बेपत्ता बनाएको बस्नेतले जानकारी दिए। दुवैजना शुक्रबार दिउँसो २ बजेतिर बेपत्ता भएपछि स्थानीयले प्रहरीलाई खबर गरेका थिए।
बेपत्ताहरूको खोजीका लागि इलाका प्रहरी कार्यालय दोभान र अस्थायी प्रहरी चौकी ढुंगेसाँगुका प्रहरी परिचालित रहेको जिल्ला प्रहरी कार्यालय ताप्लेजुङले जनाएको छ।