राष्ट्रपतिलाई अख्तियारले बुझायो वार्षिक प्रतिवेदन

राष्ट्रपति रामचन्द्र पौडेलले अख्तियार दुरुपयोग अनुसन्धान आयोगका कामकारबाही थप पारदर्शी र प्रभावकारी बनाउन आवश्यक रहेको बताएका छन्।

राष्ट्रपति कार्यालय शीतलनिवासमा अख्तियार दुरुपयोग अनुसन्धान आयोगको आर्थिक वर्ष ०८०/८१ को वार्षिक प्रतिवेदन बुझ्दै राष्ट्रपति पौडेलले यस्तो बताएका हुन्। कार्यक्रममा आयोगका प्रमुख आयुक्त प्रेमकुमार राईले राष्ट्रपति पौडेलसमक्ष आयोगको वार्षिक प्रतिवेदन प्रस्तुत गरेका थिए । 

प्रतिवेदन बुझेपछि राष्ट्रपति पौडेलले सुशासन कायम गर्ने सन्दर्भमा भ्रष्टाचारजन्य कसुरको पहिचान गर्ने, अनुसन्धान तहकिकात र अभियोजनसम्बन्धी कार्यलाई वैज्ञानिक, तथ्यपरक र नतिजामुखी बनाउने कार्य बढी महत्त्वपूर्ण भएको बताए।

यसका लागि आयोगको संस्थागत क्षमता, विकास र कर्मचारीको व्यावसायिक दक्षता अभिवृद्धि गर्दै आयोगका काम कारबाहीलाई पारदर्शी र प्रभावकारी बनाउनु अत्यावश्यक रहेको उनको भनाइ थियो।