टाइब्रेकरमा पोर्चुगललाई रोक्दै फ्रान्स युरोकपको सेमिफाइनलमा

रोमाञ्चक खेलमा टाइब्रेकरमा पोर्चुगललाई पछि पार्दै फ्रान्स युरोकप २०२४ को अन्तिम चारमा प्रवेश गरेको छ।

निर्धारित ९० मिनेट र थपिएको ३० मिनेटमा कुनै टिमले गोल गर्न नसकेपछि खेल टाइब्रेकरमा पुगेको थियो। जहाँ फ्रान्सले पोर्चुगललाई ५–३ गोलअन्तरले परास्त गर्‍यो।

जर्मनीको ह्यामवर्गस्थित खेलमैदानमा नेपाली समयअनुसार मध्यरात भएको खेल निर्धारित समय र अतिरिक्त ३० मिनेट बराबरीमा टुंगियो। दुवै टिमले केही राम्रा अवसरलाई गोलमा परिणत गर्न सकेनन्। 

क्रिस्टियानो रोनाल्डो र केलियन एम्बाप्पेबीचको प्रतिस्पर्धा पनि ठानिएको यो खेलमा दुवैले गोलका लागि निकै संघर्ष गरे, तर बललाई पोस्टको जाली चुमाउन सकेनन्। 

त्यसपछि भएको टाइब्रेकरमा पोर्चुगलका जोआओ फेलिक्सको पेनाल्टी प्रहार पोस्टमा लागेर बाहिरिएपछि फ्रान्स सेमिफाइनलमा स्थान बनाउन सफल रह्यो।

आज राति इंग्ल्यान्ड र स्विट्जरल्यान्ड तथा नेदरल्यान्ड्स र टर्कीले सेमिफाइनल प्रवेशका लागि प्रतिस्पर्धा गर्नेछन्।