मकवानपुरको उत्तरी क्षेत्रमा रहेको थाहा नगरपालिकाले आगामी आर्थिक वर्षका लागी ९१ करोड ९१ लाख ४३ हजार ५ सय रुपैयाँको बजेट सार्वजनिक गरेको छ ।
शुक्रबार आयोजित १६ औं नगरसभामा उपमेयर भरत गोपालीले चालु आर्थिक वर्षको तुलनामा आगामी आवमा करिब ८ करोड रुपैयाँले कम बजेट सार्वजनिक गरेका हुन् ।
बजेट सार्वजनिक गर्दै उपमेयर गोपालीले संघीय सरकार र प्रदेश सरकारले दिने अनुदानमा कमी आएकाले आव ०८१÷०८२ को बजेटको आकार घटेको बताए । उनले कुल बजेटमा चालु खर्चतर्फ ६२ प्रतिशत र पुँजीगततर्फ ३८ प्रतिशत बजेट विनियोजन गरिएको पनि जानकारी दिए ।
यसअघि थाहाले चालु आर्थिक वर्षका लागी थाहा नगरपालिकाले ९९ करोड ३७ लाख रुपैयाँ बजेट विनियोजन गरेको थियो ।
उपमेयर गोपालीका अनुसार थाहा नगरपालिकाले संघीय सरकारबाट समानीकरण अनुदान स्वरुप १२ करोड २८ लाख, समपूरक अनुदान स्वरुप १ करोड, विशेष अनुदान स्वरुप १ करोड, सशर्त अनुदान स्वरुप ३० करोड ७१ लाख ६ हजार ५ सय रुपैयाँ पाउँने अनुमान गरिएको छ ।
यस्तै प्रदेश सरकारबाट समानीकरण अनुदान १ करोड २३ लाख ९० हजार समपूरक अनुदान ३ करोड, विशेष अनुदान ६५ लाख, सशर्त अनुदान ७ करोड १८ लाख ६७ हजार र राजस्व बाँडफाँड ९ करोड ३५ लाख ५३ हनार गरी जम्मा २१ करोड ४३ लाख १० हजार रहेको छ ।
यसैगरी राजस्व बाडफाँडबाट १० करोड ६५ लाख ३० हजार १ सय ८२, रोयल्टीबाट १ करोड ८९ लाख ६९ हजार ८ सय गरी जम्मा ५७ करोड ५४ लाख ६ हजार ५ सय रुपैयाँ र नगरपालिकाको आन्तरिक आयतर्फ राजस्व (कर तथा गैरकर) ५ करोड र मालपोत २ करोड रुपैयाँ गरी जम्मा ७ करोड रुपैयाँ आम्दानी हुने अनुमान गरिएको छ ।
बजेट प्रस्तुत गर्दै उपमेयर गोपालीले नगरपालिकाको बजेटले कृषि, पूर्वाधार शिक्षा र पर्यटन क्षेत्रको विकासलाई प्राथमिकतामा राखेको जानकारी दिए ।