- वि.सं २o८o चैत १९ सोमबार
अफगानिस्तानको गजनी प्रान्तमा बेवारिसे बम विस्फोट हुँदा नौ बालबालिकाको ज्यान गएको छ ।
आइतबार दिउँसो चारदेखि १० वर्ष उमेर समूहका ती बालबालिकाले बेवारिसे बम खेलाउँदा अचानक विस्फोट भएको सरकारी बख्तार समाचार एजेन्सीले सोमबार जनाएको छ ।
सबैको घटनास्थलमै मृत्यु भएको बख्तारले गजनीका सूचना र संस्कृति विभागका निर्देशक मुल्लाह हमिदुल्लाह निसारलाई उद्धृत गर्दै सिन्ह्वाले जनाएको छ ।
गत २२ मार्चमा पनि दक्षिणी हेलमन्ड प्रान्तमा एक बम विस्फोटमा परेर तीन बालबालिकाको मृत्यु भएको थियो भने अन्य दुईजना घाइते भएका थिए ।
अफगानिस्तान विश्वको सबैभन्दा युद्धग्रस्त तथा बढी बारुदी सुरुङयुक्त देशहरूमध्ये एक हो जहाँ विगत चार दशकभन्दा बढी समयदेखिको युद्ध र नागरिक द्वन्द्वका कारण विस्फोट नभएका उपकरणहरू जथाभावी फालिएका छन् । (सिन्ह्वा)
