- वि.सं २o८१ बैशाख १९ बुधबार
सातौँ नेपाल अन्तर्राष्ट्रिय चलचित्र महोत्सव (निफ)को अन्तिम दिन चिनियाँ फिल्ममेकर प्राध्यापक सी फीले विश्वबजारलाई लक्षित गरेर सिनेमा बनाउन नेपाली फिल्मकर्मीहरूलाई सुझाव दिएका छन् । अल गर्ल फ्रम हुनान, ब्ल्याक स्नो, वुमन सेसेम ओइललगायत चर्चित फिल्मका निर्देशक सी निफमा जुरीको भूमिकामा समेत थिए । उनले अन्तिम दिन आफ्ना अनुभव नेपाली फिल्मकर्मी माझ यसरी साटे ।
म पहिलोपटक २०१५ नेपाल आएको थिएँ । त्यतिवेलै पहिलोपटक फिल्म हेर्ने अवसर पाएँ । कालो पोथी, सेतो सूर्यजस्ता राम्रा फिल्म बनेका थिए । अहिले इन्टरनेटबाट सबैले सबै ठाउँको फिल्म हेर्न सक्छन् । यस्तोमा राम्रो फिल्म बनाएर अन्तर्राष्ट्रिय स्तरका राम्रा पुरस्कार पायो भने दर्शक आकर्षित हुन्छन् । फिल्ममार्फत विभिन्न समुदायका सांस्कृतिक पाटोहरू उजागर गर्न सकिन्छ । नेटफ्क्सिजस्ता ठूला प्लाटफर्मसम्म पुगेर अझ धेरै दर्शकलाई आकर्षित गर्न सकिन्छ ।
सन् १९८० को दशकसम्म चाइनिज फिल्म पनि विश्वमा चिनिएको थिएन । तर, जब चाइनिज फिल्मले भेनिस, बर्लिन, कान्सजस्ता महोत्सवमा उपस्थिति जनायो । त्यसपछि विश्वमा परिचित हुँदै गयो ।’ नेपाली फिल्म उद्योगका लागि चीन पनि एउटा बजार हुन सक्छ । धेरै चाइनिज हिमाल आरोहणजस्ता साहसिक खेलका लागि नेपाल आउने गर्छन् । फिल्ममा त्यस्ता सामग्री समावेश गर्दा उनीहरूका लागि रुचिकर हुन सक्छ । व्यावसायिक फिल्म एक दिन पुराना हुनेछन् । तर, कलात्मक रूपमा बनाइएका फिल्म सधैँ ताजा रहन्छन् । त्यसैले विषयवस्तु छनोट र प्रस्तुति निकै महत्वपूर्ण हुन्छ ।
