जगदम्बा स्टिल्स लिमिटेडले यो वर्षको ‘श्री शंकरलाल गोल्ड मेडल अवार्ड २०८०’ नितेश सिलवाललाई प्रदान गरेको छ । इन्जिनियरिङ अध्ययन संस्थानको ५८औँ वार्षिक उत्सवको अवसरमा आयोजित कार्यक्रममा नितेश सिलवाललाई उनको शैक्षिक उत्कृष्टताका लागि यो अवार्ड प्रदान गरिएको हो । प्रतिष्ठित ‘श्री शंकरलाल गोल्ड मेडल अवार्ड’अन्तर्गत पुरस्कारस्वरूप सिलवाललाई पदक, प्रमाणपत्र र नगद ५१ हजार रुपैयाँ प्रदान गरिएको थियो ।
कार्यक्रमा त्रिभुवन विश्वविद्यालयका उपकुलपति, प्रा.डा. केशरजंग बराल, क्याम्पस प्रमुख, डा. खेम ज्ञावाली र अन्य सम्मानित प्रतिनिधिको उपस्थिति रहेको थियो भने कर्पोरेट म्यानेजर विदुर पुरीद्वारा ‘श्री शंकरलाल गोल्ड मेडल अवार्ड २०८०’ सिलवाललाई प्रदान गरिएको थियो ।
यो अवार्ड सन् १९८० को दशकबाट उद्यमशीलताको यात्रा सुरु गरेका प्रख्यात उद्यमी तथा जगदम्बा स्टिल्स लिमिटेडका संस्थापक शंकरलाल अग्रवालको नाममा राखिएको हो । कम्पनीले यस्ता कार्यक्रम र पुरस्कारले विद्यार्थीलाई समाजमा अर्थपूर्ण योगदानका लागि प्रेरित गर्ने विश्वास लिएको छ ।