खेलकुद प्रिन्ट संस्करण

फ्रेन्डसिप कप अन्तर्राष्ट्रिय टी–२० : हङकङविरुद्ध चलेन नेपालको ब्याटिङ

हङकङले प्रस्तुत गरेको २१३ रनको लक्ष्य पछ्याएको नेपाल कमजोर ब्याटिङका कारण १६.४ ओभरमा एक सय ३९ रनमै अलआउट

लगातार अन्तर्राष्ट्रिय क्रिकेट प्रतियोगितामा नेपाली खेलाडीको ब्याटिङ चल्न सकिरहेको छैन । ५० ओभर वा टी–२० खेल नै किन नहोस्, खेलाडीहरूले एकनासको ब्याटिङ प्रदर्शन गर्न सकेका छैनन् । कुनै एक खेलाडी पेभेलियन फर्केपछि अन्य खेलाडी पनि एकपछि अर्को गर्दै फर्किने गरेका छन् । तीन साताको अन्तरमा नेपालले आइसिसी विश्वकप लिग–२ र त्रिकोणात्मक टी–२० सिरिजमा सहभागिता जनायो । यी दुवै महत्ववपूर्ण सिरिजमा ब्याट्सम्यानले गतिलो प्रदर्शन गरेनन् ।

विश्वकप लिग–२ मा नेपालले पूरै ओभर नै खेलेन । नेदरल्यान्ड्स र नामिबियाविरुद्धको त्रिकोणात्मक टी–२० सिरिजमा नेपालका मध्यक्रमका ब्याट्सम्यान अति नै फितलो देखिएका थिए । यस्तै प्रदर्शन शनिबार हङकङमा नेपालका खेलाडीले देखाए । हङकङमा शनिबारदेखि फ्रेन्डसिप कप अन्तर्राष्ट्रिय टी–२० सुरु भएको छ । आयोजक हङकङससँग नेपाल ७३ रनले पराजित भयो । हारको मुख्य कारण नै मध्यक्रमको फितलो प्रदर्शन नै रह्यो । बाबर हयातको शतकीय सहयोगमा हङकङले २० ओभरमा ६ विकेट गुमाएर दुई सय १२ रनको बलियो योगफल खडा गरेको थियो । प्रत्युत्तरमा नेपाल १६.४ ओभरमा एक सय ३९ रनमा समेटियो । 

२१ रनभित्र आठ विकेट पतन
लक्ष्य पछ्याएको इनिङ्समा नेपाल एक समय निकै बलियो थियो । इनिङ्सको १०.६ ओभरमा कप्तान रोहितकुमार पौडेललाई गुमाउँदा नेपाल ११७–३ को बलियो स्थितिमा थियो । त्यसपछि नेपाल १६.४ ओभरमा १३९ रनमै अलआउट नै भयो । मध्यक्रमका ब्याट्सम्यान पूरै असफल हुँदा नेपाल पराजित भएको हो ।

नेपालले १२.१ ओभरमा आरिफ सेख र १२.३ ओभरमै सन्दीप जोराको विकेट गुमाएको थियो । शुक्रबार मात्र आइसिसी वरीयतामा फड्को मारेका अलराउन्डर गुल्सन झा १४.६ ओभरमा आउट भए । त्यसपछि नेपालले १५ ओभरमा थप दुई विकेट गुमाएको थियो । इनिङ्सको १५.१ ओभरमा रासिद खान र १५.४ ओभरमा प्रतीश जिसीको विकेट गुमेको थियो । नेपालले अन्तिम विकेटका रूपमा आकाश चन्दलाई गुमाएको थियो । हङकङका लागि अजाज खानले घातक बलिङ गरेका थिए । उनले ३.४ ओभरमा चार २६ रन खर्चेर चार विकेट लिएका थिए । 

विनोद, रोहित र आरिफ मात्र टिके
हङकङको कसिलो र अनुशासित बलिङमा नेपालका ओपनर विनोद भण्डारी, रोहित र आसिफ मात्र टिकेका थिए । उनीहरूले मात्र नेपालको स्कोर बोर्डमा दोहोरो रन चढाए । अन्य खेलाडीले दोहोरो रनसमेत बनाउन सकेनन् । ओपनर कुशल भुर्तेलको प्रदर्शन खस्किरहेको छ । उनले चार बल सामना गरी दुई रन मात्र बनाए । विनोद भण्डारी र रोहित पौडेलले दोस्रो विकेटका लागि ५२ रनको साझेदारी गरे ।

विनोदले २२ बलमा चार चौका र तीन छक्काको सहयोगमा ४२ रन जोडे । त्यसपछि रोहित र आरिफले तेस्रो विकेटका लागि ५७ रनको गतिलो साझेदारी गरेका थिए । रोहितले ३० रन जोडे । उनले २३ बलमा दुई चौका र एक छक्का प्रहार गरे । रोहित आउट भएको अर्को बलमा नेपालले आरिफको विकेट पनि गुमाएको थियो । आरिफले ३८ रन बटुले । उनले २१ बलमा पाँच चौका र दुई छक्का प्रहार गरेका थिए । त्यसपछि सन्दीप जोरा दुई रन, गुल्सन झा आठ रन, विवेक यादव एक रन र रासिद खान तीन रनमा आउट भए । 

बाबरले बनाए ४९ बलमा ११० रन
हङकङका बाबरले नेपालविरुद्ध उत्कृष्ट स्ट्रोक लगाए । उनले क्रिजको एक छेउमा नेपालका बलरविरुद्ध छक्का प्रहार गरे । समग्रमा उनले ४९ बलमा सर्वाधिक १३ छक्का र तीन चौकाको सहयोगमा एक सय १० रन बनाए । उनी इनिङको १९.५ ओभरमा आउट भए । उनलाई रोहितले क्याच आउट गरे । यसबाहेक हङकङको ब्याटिङमा अजाज खानले ११ बलमा दुई चौका र एक छक्का प्रहार गरी २१ रन बनाए । अंशुमन रथले ३२ बलमा दुई छक्का र तीन चौका प्रहार गरी ३९ रन बटुले । ओपनर मार्टिन कोट्जले २१ बलमा ३१ रन बनाए । उनले पाँच चौका र एक छक्का प्रहार गरेका थिए । नेपालका लागि आकाश चन्दले तीन ओभरमा तीन विकेट लिए । रासिद, प्रतीश र आरिफले समान एक विकेट हात पारे । हङकङ एक समय नौ ओभरको समाप्तिमा ६१–२ को स्थितिमा रहेको थियो । बाबर र अंशुमन रथले ७६ रनको साझेदारी गरे ।

 आकाशको डेब्यु 
नेपालका लागि तीव्र गतिका बलर आकाश चन्दले अन्तर्राष्ट्रिय टी–२० मा डेब्यु गरेका छन् । उनले हङकङविरुद्ध डेब्यु गरेका हुन् । उनलाई करण केसीले डेब्यु क्याप दिएका थिए । हङकङविरुद्ध नेपालले रासिद खान, स्पिनर सागर ढकाल र विकेटकिपर विनोद भण्डारीलाई खेलाएको छ । आकाशले यसअघि क्यानडाविरुद्ध सिरिजमा एकदिवसीय अन्तर्राष्ट्रिय डेब्यु गरेका थिए । उनले डेब्यु खेलको पहिलो ओभर बलिङ गर्दै विकेट लिए । उनले आफ्नो पहिलो ओभरमा मार्टिन कोट्जीको विकेट लिएका हुन् ।