सन्दीपका कानुन व्यवसायी जिल्ला अदालतको आदेशविरुद्ध उच्च अदालत जाने
राष्ट्रिय क्रिकेट टोलीका पूर्वकप्तान सन्दीप लामिछानेलाई जबर्जस्ती करणी मुद्दामा आठ वर्ष कैद सजाय भएको छ । जिल्ला अदालत काठमाडौंले ०७९ भदौमा एक युवतीलाई होटेलमा लगेर बलात्कार गरेको ठहर गर्दै उनलाई १३ पुसमै दोषी ठहर गरेकोमा बुधबार सजाय सुनाएको हो ।
न्यायाधीश शिशिरराज ढकालको इजलासले कैद सजायका साथै सन्दीपबाट तीन लाख जरिवानासहित पीडितलाई पाँच लाख रुपैयाँ क्षतिपूर्ति उपलब्ध गराउन आदेश दिएको हो । बलात्कार मुद्दामा पीडित १८ वर्ष उमेरमाथिको भएको अवस्थामा सातदेखि १० वर्ष कैद सजाय हुने कानुनी प्रावधान छ ।
प्रहरीले बालिका भएको दाबी गरी सरकारी वकिलमार्फत अभियोजन गरेकोमा अदालतले पीडितलाई बालिका मान्न अस्वीकार गर्दै घटनाका बखत १८ वर्ष पुगिसकेको ठहर गरेकाले मागभन्दा कम सजाय भएको हो । पीडितको नाजुक आर्थिक अवस्थाको फाइदा उठाई लामिछानेले करणी गरेकाले त्यसलाई सहमतिको करणी मान्न नमिल्ने निष्कर्ष इजलासको थियो ।
यसैलाई न्यायाधीश ढकालले सजाय निर्धारणका लागि पनि आधार मानेका छन् । ‘...पीडित परिवर्तित नाम गौशाला २६(छ) (१) ०७९/८० को उमेर, प्रतिवादी सन्दीप लामिछानेको उमेर, घटना हुँदाको अवस्था, प्रतिवादीको सामाजिक हैसियत, पीडितलाई परेको मानसिक असरसमेतलाई विचार गर्दा प्रतिवादी सन्दीप लामिछानेलाई मुलुकी अपराध संहिता, २०७४ को दफा २१९(३)(ङ) बमोजिम आठ वर्ष कैद र दफा २१९(३क)(ग) बमोजिम ३,००,००० रुपैयाँ जरिवाना हुने,’ सजाय निर्धारण आदेशमा भनिएको छ ।
त्यस्तै, अदालतले पीडितलाई क्षतिपूर्ति भराउनसमेत आदेश दिएको छ । ‘पीडितलाई पुग्न गएको मानसिक असरसमेतलाई विचार गरी दफा २२८ बमोजिम प्रतिवादीलाई भएको जरिवाना ३,००,००० रुपैयाँ र थप २,००,००० रकम क्षतिपूर्तिबापत प्रतिवादी सन्दीप लामिछानेबाट पीडित गौशाला २६(छ) (१)०७९/८० लाई भराइदिने ठहर्छ,’ आदेशमा उल्लेख छ ।
महानगरीय प्रहरी वृत्त गौशालामा २१ भदौमा लामिछानेले बलात्कार गरेको भन्दै किटानी जाहेरी परेको थियो । ५ भदौ ०७९ मा आफू भेट्न जाँदा नगरकोट लगेको र फर्केर काठमाडौं आउँदा एउटै कोठामा बसेको र राति जबर्जस्ती करणी गरेको दाबी पीडितको थियो ।
पीडितका दाइले दिएको जाहेरीका आधारमा प्रहरीले अनुसन्धान गरेको थियो भने सरकारी वकिलको कार्यालयले १४ कात्तिक ०७९ मा जिल्ला अदालत काठमाडौंमा मुद्दा दायर गरेको थियो । खेलकै क्रममा विदेश रहेका लामिछाने लामो समय लुकेर त्यतै बसेका थिए । पछि नेपाल फर्किँदा उनी २० असोजमा एयरपोर्टबाटै पक्राउ परेका थिए ।
जिल्ला अदालतमा थुनछेक बहसका क्रममा थुनामा पठाउने आदेश भए पनि उच्च र सर्वोच्चको आदेशबाट लामिछाने धरौटी तिरेर रिहा भएका थिए । त्यतिवेला उनी प्रहरी हिरासत र जेल गरी एक सय दिन थुनामा बसेका थिए ।
जिल्ला अदालतले फैसला गर्दै पीडितलाई लिई लामिछाने नगरकोटस्थित रिसोर्ट गएको देखिएको तथा काठमाडौं फर्की एउटै कोठामा बसेको र करणी भएको पुष्टि गरेको थियो । सिसिटिभी फुटेज तथा घटना हुँदाको दिनको क्रियाकलापको घटनाक्रमसमेतलाई ध्यान दिइएको इजलासको ठहर छ ।
आठ वर्ष कैद सजाय भए पनि लामिछाने यसअघि धरौटीमा छुटेकाले तत्काल जेल भने बस्नुपर्ने छैन । १० वर्षभन्दा कम सजाय हुने मुद्दाका अभियुक्त थुनाबाहिरै बसेर उच्चमा पुनरावेदन गर्न पाउने सुविधा कानुनमा छ । यद्यपि, त्यसका लागि अदालतले अनुमति भने दिनुपर्ने हुन्छ । सन्दीपका कानुन व्यवसायीले जिल्ला अदालतको आदेशविरुद्ध उच्च जाने बताएका छन् ।