- वि.सं २o८o पौष २० शुक्रबार
नेसनल लघुवित्त वित्तीय संस्था लिमिटेडले जाजरकोट केन्द्रविन्दु भई गएको भूकम्पका पीडितलाई आर्थिक सहयोग गरेको छ । लघुवित्तले कुल ५० लाख रुपैयाँ सहयोग गरेको हो । लघुवित्तले मानवीय सहायताअन्तर्गत सल्यानको दार्मा गाउँपालिकाका भूकम्पपीडितका लागि गाउँपालिका विपत् कोषमा चार लाख रुपैयाँ सहयोग हस्तान्तरण गरेको जनाएको छ ।
त्यस्तै, बागचौर शाखाअन्तर्गत वित्तीय संस्थामा आबद्ध ६ सय ८१ जना सेवाग्राहीलाई राहतस्वरूप २१ लाख ५४ हजार रुपैयाँ आर्थिक सहयोग गरेको जनाइएको छ । त्यस्तै, रुकुम–पश्चिमको आठबिसकोट नगरपालिकालाई चार लाख रुपैयाँ तथा आठबिसकोट शाखाअन्तर्गत वित्तीय संस्थामा आबद्ध तीन सय ७० जना सेवाग्राहीलाई ११ लाख ६४ हजार रुपैयाँ आर्थिक सहयोग गरेको संस्थाले जनाएको छ । त्यस्तै, मुसिकोट नगरपालिकामा रहेको सेरीगाउँ शाखाका सेवाग्राही सदस्यहरू दुई सय ५० जनालाई सात लाख ५६ हजार रुपैयाँ आर्थिक सहयोग गरेको जनाइएको छ ।
दुई अलग–अलग कार्यक्रममा संस्थाका प्रमुख कार्यकारी अधिकृत (सिइओ) तथा नेपाल लघुवित्त बैंकर्स संघका अध्यक्ष रामबहादुर यादवले दार्मा गाउँपालिका अध्यक्ष निमबहादुर केसी र आठबिसकोट नगरपालिकाका मेयर रवि केसीलाई चेक हस्तान्तरण गरेको जनाइएको छ ।
सहयोग प्रदान गर्दै नेसनल लघुवित्तका सिइओ रामबहादुर यादवले दुर्गम गाउँ–बस्तीमा आफ्ना सेवाग्राही सदस्यलाई सामाजिक तथा आर्थिक उत्थानका लागि लघुवित्त कार्यक्रमका माध्यमबाट गरिबी न्यूनीकरणमा टेवा पुर्याउने बताए । हाल लघुवित्तले देशका ७२ जिल्लामा दुई लाख २० हजारभन्दा बढी सदस्यबीच वित्तीय कारोबार सञ्चालन गरिरहेको जनाएको छ ।
