नेपाली नक्कली रुपैयाँसहित रौतहटबाट एकजना पक्राउ परेका छन् । प्रहरीले १८ लाख रुपैयाँभन्दा बढीको नेपाली नक्कली नोटसहित रौतहटका एक युवकलाई पक्राउ गरेको हो ।
रौतहटको देवाही गोनाही नगरपालिका– ८ पटेल चोकबाट गुजरा नगरपालिका– ५ हरिहरपुरका २५ वर्षीय सन्दीप जयसवाललाई १८ लाख ४३ हजार नक्कली रुपैयाँसहित प्रहरीले पक्राउ गरेको छ ।
सवारी चेकजाँचको क्रममा प्रहरीले जयसवालको साथबाट एक हजार आठ सय ४३ थान एक हजार दरको नक्कली नोट बरामद गरेको जिल्ला प्रहरी कार्यालय रौतहटका प्रवक्ता डिएसपी एलिजा गिरीले जानकारी दिइन् ।
पछिल्लो समय रौतहटका विभिन्न ग्रामीण बजारबाट फाटफुट रूपमा नक्कली नोटहरू बरामद हुन थालेपछि प्रहरीले आफ्नो संयन्त्र प्रयोग गर्दै गोप्य सूचनाका आधारमा सो रकम बरामद गरेको हो ।
नक्कली नोटसहित पक्राउ परेका जयसवाललाई मुद्रासम्बन्धी कसुरअन्तर्गत आवश्यक अनुसन्धान तथा कारबाही अगाडि बढाएको डिएसपी गिरीले बताइन् ।
जयसवालको साथबाट विभिन्न बैंकको पाँच थान एटिएम कार्ड र १६ लाख ६५ हजार उल्लेख भएको चेकसमेत बरामद भएको जिल्ला प्रहरी कार्यालय रौतहटले जनाएको छ ।
यसअघि पनि प्रहरीले शिवनगर मेलाबाट भारतीय नोटसहित चारजना, गरुडा नगरपालिका– ४ बाट हजार दरका सात थान नक्कली नोटसहित तीनजना र बालचनपुरबाट हजार दरको २० थान नक्कली नोटसहित एकजनालाई पक्राउ गरेको थियो ।