पुस लागेसँगै काठमाडौं उपत्यकामा चिसो ह्वात्तै बढेको छ । दिनको तुलनामा बिहान र साँझ–बेलुकी कठ्यांग्रिने चिसो छ । तर, त्रिपुरेश्वरस्थित दशरथ रंगशालाको माहोल भने बिलकुल भिन्न छ । जब साँझ पर्छ, रंगशाला दर्शकको हुटिङ, थपडी र अनेकथरी गाजाबाजाका आवाजले गुन्जिन्छ ।
कारण हुन्, करिब महिना दिनदेखि चलिरहेको नेपाल सुपर लिगको दोस्रो संस्करणका खेल । सोमबार पनि त्यस्तै भयो ।
एनएसएलको पहिलो क्वालिफायर भिड्दै थिए, धनगढी एफसी र पोखरा थन्डर्स । दुवै हजारौँ समर्थक भएका टिम । त्यसैले सोमबारको साँझ चिसोको पर्वाह नगरी दशरथ रंगशाला पुगेका थिए ।
खेलको पाँच मिनेटमै पोखराका आयुषले प्राप्त मौकालाई सदुपयोग गर्दै बललाई जाली चुमाएपछि पोखराका समर्थकको हुटिङले रंगशाला थर्कियो । तर, अर्कोतिर धनगढीका समर्थकमा मौनता छायो । तर, धनगढीले पनि गोलका लागि निरन्तर प्रयास गरिरहँदा उसका दर्शक पनि आफ्ना खेलाडीलाई हौस्याइरहेका थिए ।
अन्ततः ५४औँ मिनेटमा धनगढीका समर्थकले पनि रंगशालामा आवाज गुञ्जाउने मौका पाए । यही क्रम दुईपटकसम्म चल्यो । पुनः पालो पोखराका दर्शकको आयो, खेल सकिनँ, केही सेकेन्ड मात्र रहँदा निराश बनिसकेका धनगढीका दर्शकले पुनः उफ्रिने मौका पाए ।
निर्धारित ९० र थपिएको ३० मिनेटमा दुई–दुई गोल भएपछि खेल टाइब्रेकरमा पुग्यो । टाइब्रेकरमा भने पोखराका दर्शक निराश बन्न बाध्य भए । धनगढीले लगातार दोस्रो संस्करणमा पनि फाइनल पुग्ने टिमका रूपमा आफूलाई अब्बल साबित गर्याे ।