- वि.सं २o८१ जेठ २ बुधबार
साहित्य संगम नुवाकोटले दुईदिने साहित्य महोत्सव गर्ने भएको छ । साहित्य संगमले आगामी साता (१४ र १५ गते) देशभरका चर्चित साहित्यकार सहभागी गराएर ‘नुवाकोट साहित्य, पर्यटन तथा संस्कृति महोत्सव’ गर्न लागेको हो ।
महोत्सवको पहिलो दिन स्थानीय लाखे नाच, भजनबालन, कविता वाचन र गजल साँझ रहेको र दोस्रो दिन नुवाकोट जिल्लाका पर्यटकीय स्थलहरुमा स्रष्टा तथा साहित्यकारहरूलाई भ्रमण गराई कार्यपत्र प्रस्तुत गरिने कार्यतालिका रहेको अध्यक्ष सुमित्रा सुमीले जानकारी दिइन् ।
साथै, महोत्सवमा नेपालका विभिन्न भाषा, साहित्य, कला र संस्कृतिका क्षेत्रमा विशेष योगदान गर्ने स्रष्टाहरुलाई सम्मान कार्यक्रम तय भएको छ । महोत्सवले स्थानीय भाषा, साहित्य, कला, संस्कृति, पर्यटन विकासलगायतका विषयलाई प्राथमिकता राखेको पनि उनले बताइन् ।
साहित्यको माध्यमबाट सामाजिक चेतना अभिवृद्धि, राज्यका निकाय र जनप्रतिनिधिहरुलाई साहित्यमार्फत ध्यानाकर्षण गरी जिम्मेवार बनाउने महोत्सवको उद्देश्य रहेको उनको भनाइ छ ।
