अस्ट्रेलियाको रोमाञ्चक जित

न्युजिल्यान्डविरुद्ध रोमाञ्चक जित निकाल्दै अस्ट्रेलियाले आइसिसी एकदिवसीय विश्वकपको शीर्ष चारको सम्भावना बनायो

न्युजिल्यान्डविरुद्धको रोमाञ्चक खेलमा पाँच रनको जित निकाल्दै अस्ट्रेलियाले आइसिसी एकदिवसीय विश्वकपको सेमिफाइनल सम्भावना बलियो बनाएको छ । सुरुवाती खेलमा कमजोर प्रदर्शन गरेको अस्ट्रेलियाले न्युजिल्यान्डविरुद्ध भने सानदार प्रदर्शन गरेको थियो । कीर्तिमानी पाँचपटकको च्याम्पियन अस्ट्रेलियाको विश्वकपमा चौथो जित हो ।

न्युजिल्यान्डको भने दोस्रो हार हो । अस्ट्रेलियाले दिएको तीन सय ८८ रनको लक्ष्य पछ्याएको न्युजिल्यान्डले ९ विकेट गुमाएर मात्र तीन सय ८३ रन बनाउन सक्यो । अन्तिम ओभरमा न्युजिल्यान्डलाई १९ रन चाहिएको थियो । अन्तिम बलमा ६ रन चाहिएको अवस्थामा न्युजिल्यान्ड चुक्यो । जारी विश्वकपमा सातौँपटक ३५० रन पूरा भएको छ । 

अस्ट्रेलियाको जितमा ट्राभिस हेडले शतकीय इनिङ्स खेले । उनले ६७ बलमा एक सय ९ रन बनाएका हुन् । न्युजिल्यान्डको इनिङ्समा रचिन रविन्द्रले ८९ बलमा एक सय १६ रन बनाए पनि टोलीलाई जित दिलाउन सफल भएनन् । जितपछि समान ६ खेलबाट दुवै टोलीको समान ८ अंक रहेको छ । नेट रनरेटका आधारमा न्युजिल्यान्ड तेस्रो र अस्ट्रेलिया चौथो स्थानमा छ । समान १० अंक भए पनि दक्षिण अफ्रिका पहिलो र भारत दोस्रो स्थानमा छ । भारतले एक खेल कम खेलेको छ । शनिबार नै भएको खेलमा नेदरल्यान्ड्सले बंगलादेशलाई ८७ रनले पराजित गरेको छ ।

रचिनको शतक छायामा
न्युजिल्यान्डको इनिङ्समा तेस्रो नम्बर क्रिज आएका रचिन रविन्द्रले शतकीय इनिङ्स खेलेका थिए । यद्यपि, उनको शतक छायामा परेको छ । रचिनले ८९ बलमा ९ चौका र ५ छक्कासहित एक सय १६ रन बनाए । रचिनले विश्वकपमा दोस्रो शतक बनाएका हुन् । उनी विश्वकपमा दोस्रो शतक हान्ने पहिलो युवा खेलाडी बनेका छन् । उनले भारतीय खेलाडी सचिन तेन्दुलकरको कीर्तिमान तोडेका हुन् । सचिनले २४ वर्षमा दुई शतक प्रहार गरेका थिए । 

डेरी मिचल र जेम्स निसमले अर्धशतक बनाए । मिचलले ५१ बलमा ५४ रन बनाए । निसमले ३९ बलमा आक्रामक ब्याटिङ गर्दै ५८ रन जोडेका हुन् । यसबाहेक डेभन कोन्वेले २८ र विल योङले ३२ रनको योगदान गरेका थिए । दुईबीच ६१ रनको साझेदारी भएको थियो । मिचेल र रविन्द्रबीच सर्वाधिक ९६ रनको साझेदारी भएको हो । अस्ट्रेलियाका लागि एडम जाम्पाले सार्वधिक तीन विकेट लिए । यसैगरी, कप्तान प्याट कमिन्स र जस हैजलउडले समान दुई विकेट लिँदा ग्लेन म्याक्सवेलले एक विकेट लिएका थिए । 

हेडको आक्रामक शतक
यसअघि विश्वकपको २७औँ खेलमा अस्ट्रेलियाले टस हारेर ब्याटिङ गरेको थियो । ओपनर डेविड वार्नर र हेडको सानदार ब्याटिङसँगै अस्ट्रेलियाले ४९.२ ओभरमा अलआउट हुँदै तीन सय ८८ रन बनाएको थियो । हेडले जारी विश्वकपमा पहिलो खेल खेलेका हुन् । उनले ६७ बलमा १० चौका र सात छक्का प्रहार गरे । यसअघि घाइते हुँदा उनी चार खेलमा बेन्चमै सीमित थिए । उनको यो करिअरको चौथो तथा विश्वकपमा पहिलो शतक हो । यो विश्वकपमा कम बलमा बनेको तेस्रो शतक हो । यसअघि, ग्लेन म्याक्सवेलले ४० र एडम मार्करमले ४९ बलमा शतक बनाएका छन् । यसअघि अस्ट्रेलियाले पावर प्लेमा विनाविकेट एक सय १८ रन बनाएको थियो । 

यसैगरी, अर्का ओपनर वार्नरले ६५ बलमा पाँच चौका र ६ छक्कासहित ८१ रन बनाए । हेड र वार्नरले पहिलो विकेटका लागि एक सय ७५ रनको बलियो साझेदारी गरेका थिए । वार्नरको यो करिअरकै २३औँ अर्धशतक हो । म्याक्सवेलले ४१ रन, जस इङ्लिसले ३८, कप्तान कमिन्सले ३८ रनको योगदान गरेका थिए । न्युजिल्यान्डका ट्रेन्ट बोल्ट र ग्लेन फिलिप्सले समान तीन विकेट लिए । बोल्टले १० ओभरमा ७७ र फिलिप्सले समान १० ओभरमा ३७ रन खर्चिएका थिए । मिचल सान्टनरले दुई तथा माट हेन्री र निसमले समान एक विकेट लिएका थिए ।