- वि.सं २o८१ बैशाख २० बिहीबार
ब्याटिङमा अर्जुन कुमाल र बलिङमा दीपेश कँडेलले उत्कृष्ट प्रदर्शन गरेपछि साउदीलाई विशाल रनअन्तरले हराउँदै नेपाल एसिसी यू–१९ प्रिमियर कपको सेमिफाइनलमा प्रवेश गरेको छ ।
मलेसियामा जारी प्रतियोगिताअन्तर्गत आज भएको खेलमा साउदी अरबलाई तीन सय एक रनको विशाल अन्तरले पराजित गर्दै नेपाल एसिसी यू–१९ प्रिमियर कपको सेमिफाइनलमा प्रवेश गरेको हो ।
टस जितेर साउदीले पहिले फिल्डिङ रोजेपछि ब्याटिङ गरेको नेपालले आठ विकेट गुमाएर तीन सय ४७ रन बनाएको थियो । नेपालले दिएको विशाल लक्ष्य पछ्याउने क्रममा साउदी १९.१ ओभरमा केवल ४६ रनमै अलआउट भएपछि नेपालले तीन सय एक रनको जित हासिल गरेको हो ।
साउदीलाई सस्तैमा समेट्ने क्रममा नेपालका दीपेश कँडेलले ६, आकाश चन्दले दुई र सुवास भण्डारीले एक विकेट लिए । दीपेशले यसअघि पनि ६ विकेट लिएर सनसनीपूर्ण प्रदर्शन गरेका थिए ।
त्यसअघि अर्जुनलले एक सय ४२ रनको इनिङ खेलेपछि नेपालले रनको पहाड खडा गरेको थियो । नेपालका लागि आकाश त्रिपाठीले ८९ को योगदान दिए ।
