मुख्य समाचार डिजिटल संस्करण

काठमाडौं १६ का वडाध्यक्ष मुकुन्द रिजालको निधन

काठमाडौं महानगरपालिका– १६ का वडाध्यक्ष मुकुन्द रिजालको निधन भएको छ । डेंगुबाट संक्रमित भएका रिजालको आज बिहान ग्रान्डी अस्पतालमा उपचारका क्रममा असामयिक निधन भएको महानगरका प्रवक्ता नवीन मानन्धरले नयाँ पत्रिकालाई जानकारी दिए ।

प्रवक्ता मानन्धरका अनुसार पाँच  दिनअघि अस्पताल भर्ना भएका रिजालको फोक्सोमा पानी जम्ने र निमोनियाको समस्या थियो । स्वास्थ्य अवस्था नाजुक बनेपछि दुई दिनदेखि भेन्टिलेटरमा राखेर उनकाे उपचार भइरहेको थियो । 

उनी कांग्रेसबाट निर्वाचित जनप्रतिनिधि हुन् । कांग्रेस काठमाडौं क्षेत्र नं. ७ का क्षेत्रीय सभापतिसमेत रहेका रिजाल काठमाडौं महानगरपालिका– १६ मा दोस्रोपटक वडाध्यक्षमा निर्वाचित भएका थिए ।

महानगरले रिजालको पार्थिव शरीर अन्तिम श्रद्धाञ्जलीका लागि राष्ट्रिय सभागृहमा राख्ने भएकाे छ । उनको आजै पशुपति आर्यघाटमा अन्त्येष्टि गरिने पारिवारिक स्राेतले जानकारी दिएको छ । वडाध्यक्ष रिजालका श्रीमती र दुई छोरा छन् ।