काभ्रे । काभ्रेपलाञ्चोकको बनेपा नगरपालिका– १३, भैँसेपाटीस्थित अरनिको राजमार्गमा ग्यास बुलेटले मोटरसाइकललाई ठक्कर दिँदा नाै वर्षीय बालकको मृत्यु भएको छ भने उनका बुवा र आमा घाइते भएका छन्।
असोज ३१ गते (शनिबार) बिहान करिब ५:३० बजे काठमाडौंबाट बनेपातर्फ आउँदै गरेको भारतीय नम्बर प्लेटको ग्यास बुलेट HR38AL1634 ले सोही दिशातर्फ गइरहेको मोटरसाइकल (बा.प्र.०७१ प ७०६३)लाई ठक्कर दिएको हो।
दुर्घटनामा मोटरसाइकलचालक खोटाङको ऐँसेलुखर्क गाउँपालिका– ६ निवासी २९ वर्षीय चन्द्र बुढाथोकी, उनकी २७ वर्षीया श्रीमती रेणुका राई र नाै वर्षीय छोरा जुवास बुढाथोकी घाइते भएका थिए।
घाइते तीनैजनालाई उपचारका लागि बनेपास्थित शिर मेमोरियल अस्पताल लगिएको थियो। उपचारका क्रममा चिकित्सकले बिहान ६ बजे बालक जुवासलाई मृत घोषणा गरेका थिए। उनका बुवा र आमाको उपचार भइरहेको छ।
दुर्घटनामा संलग्न दुवै सवारीसाधन तथा ग्यास बुलेटका चालक भारतनिवासी करिब ३७ वर्षीय शिवजी रामलाई प्रहरीले नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।
