पोखरामा पहिलोपटक घर निर्माण फेस्ट 

नयाँ घर निर्माणका लागि आवश्यक सम्पूर्ण सेवाहरू एउटै छतमुनि समेटेर जानकारी दिने उद्देश्यका साथ पोखरामा पहिलोपटक राष्ट्रिय घर निर्माण फेस्ट २०८२ हुने भएको छ । स्किल सेवाको आयोजनामा पोखरा– १० स्थित अमरसिंह चौरमा शुक्रबारदेखि सुरु हुने फेस्ट शनिबारसम्म चल्ने आयोजकले बिहीबार पोखरामा पत्रकार सम्मेलन गरी जानकारी दिएका हुन् ।

घर निर्माण सहजीकरणको एकीकृत प्लाटफर्म उपलब्ध गराउनु साथै घर निर्माणसम्बन्धी मापदण्ड तथा अत्याधुनिक प्रविधिबारे सर्वसाधारण एवं सरोकारवालाहरूलाई जानकारी दिने मुख्य उद्देश्य फेस्टको रहेको स्किल सेवाका सञ्चालक समन कुँवरले जानकारी दिए। फेस्टमार्फत आधुनिक विचार, प्राविधिक दक्षता र लगानीको उचित व्यवस्थापनमार्फत घर निर्माणका नवीनतम अवधारणालाई व्यवहारमा उतार्न सहयोग पुर्‍याउने कुँवरको भनाइ छ।

फेस्टमा आधुनिक र पारम्परिक डिजाइन, खुला स्थानको सदुपयोग, ऊर्जा बचत तथा हावापासको उचित व्यवस्थापनका साथै गुणस्तरीय विचारहरूको प्रस्तुतिसँगै लगानी जुटाउने र साझेदारीका अवसरहरूसमेत उजागर गरिनेछन् जसले समग्र आवास निर्माण क्षेत्रमा सकारात्मक परिवर्तन ल्याउने अपेक्षा आयोजकको रहेको कुँवरले जानकारी दिए। 

फेस्टमा घरधनी, निर्माण व्यवसायी, इन्जिनियर, वास्तुकलाविद्, नगरपालिकाका अधिकारी, उद्यमी, विद्यार्थी र इच्छुक जनसमुदायका प्रतिनिधिहरू सहभागी हुने फेस्टको पाँच हजारभन्दा बढीले अवलोकनसँगै आवश्यक जानकारी लिने आयोजकको अपेक्षा रहेको स्किल सेवाका सञ्चालक सताक्षी मिश्रले जानकारी दिइन् । निर्माणका क्रममा दक्ष जनशक्ति र प्रविधिको प्रयोगले घर मजबुत र टिकाउ बन्ने उनकाे भनाइ थियो। प्रत्येक मानिसका लागि घर जीवनको सबैभन्दा मूल्यवान सम्पत्ति रहेकाले यसलाई भरपर्दो, सुरक्षित र दिगो बनाउनु आवश्यक रहेकाले फेस्टले त्यसबारे जानकारी दिनेछ । फेस्टमार्फत घर निर्माण गर्दा खर्च कम गर्ने उपायबारे जानकारीसँगै कस्तो खालको सिमेन्ट प्रयोग गर्ने, कस्तो इँटा, डन्डी, ग्लास, टायल्स प्रयोग गर्ने भन्नेबारेमा समेत जानकारी दिइने उनले बताइन् । साथै लेबर व्यवस्थापन, डिजाइन, रेक्ट्याङ्गुलर निर्माण योजना, निर्माण अवधिदेखि फ्लोलिङ र समापनसम्मको स्टेप–बाइ–स्टेप प्रक्रियाबारे समेत जानकारी दिइने मिश्रले बताइन् । 

स्किल सेवाका सिइओ रमेश तिमल्सिनाका अनुसार फेस्टमा विभिन्न निर्माणसम्बन्धी कम्पनीहरू, बैंकलगायतका गरी ३२ वटा स्टल रहनेछन्। फेस्टमा इन्टेरियरका सामानहरू सुपथ मूल्यमा पाइने उनले बताए। घर निर्माण गर्दा आवश्यक कुरा मात्र राख्दा खर्च कम हुने बताउँदै यसकाे सहजीकरणका लागि एकीकृत प्लाटफर्म उपलब्ध गराउने आयोजकको उद्देश्य रहेको बताए। फेस्टमार्फत घर निर्माण गर्दा भरपर्दो, सुरक्षित र दिगो कसरी बनाउने भन्ने कुराको जानकारी फेस्टमार्फत उठाउन तिमिल्सिनाले सर्वसाधारणसँगै सरोकारवालाहरूलाई आग्रह गरेका थिए।