चुरोट तथा सुर्तीको प्याकेटमा शतप्रतिशत चेतावनीयुक्त चित्र छाप्नुपर्ने रिटमा कारण देखाऊ आदेश

चुरोट तथा सुर्तीजन्य पदार्थको प्याकेटमा शतप्रतिशत चेतावनीमूलक चित्र छाप्ने विषयमा सर्वोच्च अदालतले उद्योग वाणिज्य तथा आपूर्ति मन्त्रालयसहितका सरकारी निकायलाई १५ दिनभित्र लिखित कारण पेस गर्न आदेश गरेको छ ।

उपभोक्ता अधिकारकर्मीसमेत रहेका वरिष्ठ अधिवक्ता ज्योति बानियाँले स्वास्थ्य तथा जनसंख्या मन्त्रालयको निर्णय कार्यान्वयनको माग राख्दै दिएको रिटमा सर्वोच्चले कारण देखाऊ आदेश जारी गरेको हो । रिटको सुनुवाइ गर्न २२ वैशाखमा अर्को पेसीसमेत तोकिएको छ ।

‘सर्वोच्चमा दर्ता भएको निवेदनमा न्यायाधीश हरिप्रसाद फुयाँलको इजलासबाट विपक्षीलाई कारण देखाऊ आदेश जारी हुनुका साथै अन्तरिम आदेशका लागि अदालतमा झिकाउने आदेश पनि भएको छ,’ अधिवक्ता बानियाँले भने ।

रिटमा प्रधानमन्त्री तथा मन्त्रिपरिषद् कार्यालय, उद्योग मन्त्रालय र मन्त्रालयमातहतको औद्योगिक तथा लगानी प्रवर्द्धन बोर्ड, स्वास्थ्य मन्त्रालय, राष्ट्रिय स्वास्थ्य शिक्षा सूचना तथा सञ्चार केन्द्र र सातै प्रदेशका मुख्यमन्त्री तथा मन्त्रिपरिषद् कार्यालयलाई विपक्षी बनाइएको छ ।

रिटमा स्वास्थ्य मन्त्रालयले जारी गरेको ‘सुर्तीजन्य पदार्थको बट्टा, प्याकेट, ¥यापर्स, पेटी तथा पार्सल प्याकेजिङमा चेतावनीमूलक सन्देश र चित्र छाप्ने तथा अंकित गर्ने निर्देशिका, ०८१’ को पूर्ण कार्यान्वयनको माग छ ।